ବାରଙ୍ଗ,୨ା୧୧(ଲିଙ୍ଗରାଜ ରାଉତ): ଗୋଡ଼ି ସାହି ଫାଣ୍ଡି ଅଧୀନ ଏକ ଗ୍ରାମର ଜଣେ ନାବାଳିକାଙ୍କୁ ଗର୍ଭବତୀ କରିବାଅଭିଯୋଗରେ ପୋଲିସ ଜଣଙ୍କୁ ଅଟକ ରଖି ପଚରାଉଚରା କରୁଛି। ଅଟକ ଯୁବକ ଜଣଙ୍କ ମଞ୍ଚେଶ୍ୱର ଥାନା ଅଧୀନ ଅଞ୍ଚଳରେ। ସେ ଏକ ଦୁଗ୍ଧ କମ୍ପାନୀରେ ଠିକା କର୍ମଚାରୀ ଭାବେ କାମ କରୁଥିବାବେଳେ ସେ ବିବାହିତ ବୋଲି ଜଣାପଡ଼ିଛି। ସୂଚନା ମୁତାବକ, ସେ ଘର ଭଡ଼ା ନେଇ ଗୋଡ଼ି ସାହି ଫାଣ୍ଡି ନିକଟ ଏକ ଗଁାରେ ରହୁଥିଲେ। ଘର ପାଖରେ ରହୁଥିବା ନାବାଳିକାଙ୍କୁ ପ୍ରେମ ଜାଲରେ ଫସାଇ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ନାବାଳିକା ଜଣଙ୍କ ଗର୍ଭବତୀ ଥିବା ଜଣାପଡ଼ିବା ପରେ ପରିବାର ଲୋକେ ତାର ଗର୍ଭ ନଷ୍ଟ କରିବାକୁ ବୁଧବାର କଟକ ବଡ଼ ଡାକ୍ତରଖାନାକୁ ଯାଇଥିଲେ। ସେଠାରେ ନାବାଳିକାଙ୍କ ବୟସକୁ ନେଇ ଦ୍ୱନ୍ଦ୍ୱ ଉପୁଜିବାରୁ ଡାକ୍ତରଙ୍କ ପରାମର୍ଶକ୍ରମେ ଆଧାର କାର୍ଡ ଯାଞ୍ଚ କରାଯାଇଥିଲା। ନାବାଳିକାଙ୍କ ବୟସ ୧୩ବର୍ଷ ଜଣାପଡ଼ିବା ପରେ ଗର୍ଭପାତ କରିବାକୁ ଡାକ୍ତର ମନା କରିବା ସହ ତୁରନ୍ତ ମଙ୍ଗଳାବାଗ ଥାନା ପୋଲିସକୁ ଏ ବିଷୟରେ ଜଣାଇଥିଲେ। ମଙ୍ଗଳାବାଗ ଥାନା ପୋଲିସଠାରୁ ଖବରପାଇ ବାରଙ୍ଗ ଥାନା ପୋଲିସ ଘଟଣାରେ ସମ୍ପୃକ୍ତ ଯୁବକକୁ ଅଟକ ରଖି ପଚରାଉଚରା ଆରମ୍ଭ କରିଛି।