ସମ୍ବଲପୁର,୧୩।୧୧(ବ୍ୟୁରୋ): ସମ୍ବଲପୁର ଜିଲା ବୁର୍ଲା ଥାନା ବିଷ୍ଣୁପଡ଼ାର ରାମଚନ୍ଦ୍ର ମେହେର(୨୫)ଙ୍କୁ ଅପହରଣ ପରେ ହତ୍ୟା ଘଟଣାରେ ପୋଲିସ ଆଉ ୩ଜଣଙ୍କୁ ଗିରଫ କରିଛି। ସେମାନେ ହେଲେ ମହତାବ ନଗରର ଅଜୟ ବନଛୋର, ବିଶାଳ କୁମ୍ଭାର, ଶିବ କୁମ୍ଭାର। ପୂର୍ବରୁ ମୁଖ୍ୟ ଅଭିଯୁକ୍ତ ଟୁଲୁ ବନଛୋର ଗିରଫ ହୋଇଥିଲେ। ଅନ୍ୟପକ୍ଷେ ଏହି ମାମଲାରେ ଗିରଫ ସଂଖ୍ୟା ୪ରେ ପହଞ୍ଚତ୍ଛି । ଏନେଇ ଥାନାରେ ଏକ ମାମଲା(ନଂ. ୫୬୫/୨୨) ରୁଜୁ ହୋଇଛି। ଏହି ଘଟଣାକୁ ନେଇ ବୁର୍ଲା ଅଞ୍ଚଳରେ ଚାପ ଉତ୍ତେଜନା ଲାଗି ରହିଛି ।
ବିଭିନ୍ନ ସାମାଜିକ ଅନୁଷ୍ଠାନର ସଦସ୍ୟମାନେ ପୋଲିସକୁ ଭେଟି ବୁର୍ଲା ସହରରେ ଶାନ୍ତିଶୃଙ୍ଖଳା ବଜାୟ ରଖିବା ପାଇଁ ଅନୁରୋଧ କରିଛନ୍ତି । ଉଭୟ ଗୋଷ୍ଠୀ ମଧ୍ୟରେ ପୁଣି ଯେଭଳି ସଂଘର୍ଷ ନ ହେବ ସେନେଇ ପଦକ୍ଷେପ ନେବାକୁ ଦାବି କରାଯାଇଛି। ସୂଚନାଯୋଗ୍ୟ, ନଭେମ୍ବର ୯ରେ ବୁର୍ଲା ଥାନା ନିକଟରେ ଉଲଗ୍ନ ଅବସ୍ତାରେ ରାମଚନ୍ଦ୍ରଙ୍କ ମୃତଦେହ ଫିଙ୍ଗି ଦୁର୍ବୁତ୍ତମାନେ ଫେରାର ହୋଇଯାଇଥିଲେ। ଏହି ଘଟଣା ଜିଲାବ୍ୟାପି ଆଲୋଡନ ସୃଷ୍ଟି କରିଥିଲା । ପୋଲିସ ପୂର୍ବ ଶତ୍ରୁତାକୁ ନେଇ ହତ୍ୟାକାଣ୍ଡ ଘଟିଥିଲା କହି ଟୁଲୁ ବନଛୋରଙ୍କୁ ପ୍ରଥମେ ଗିରଫ କରିଥିଲା । ଏହାର ୩ ଦିନ ପରେ ପୁଣି ୩ ଜଣଙ୍କୁ ଗିରଫ କରିଛି ।