ଦେଓଗାଁ,୨୬ା୮(ଡି.ଏନ.ଏ.): ବଲାଙ୍ଗୀର ଜିଲା ଦେଓଗାଁ ଥାନା ଅଧୀନ ଅପାମରା ଗାଁର ଜଣେ ୧୯ବର୍ଷୀୟା ଯୁବତୀଙ୍କୁ ତାଙ୍କ ପ୍ରେମିକ ପ୍ରତାରଣା ଦେବାପରେ ହତ୍ୟା କରିଥିବା ଅଭିଯୋଗ ହୋଇଛି। ଏ ନେଇ ଯୁବତୀଙ୍କ ବାପା ଦେଓଗାଁ ଥାନାରେ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ଦେଓଗାଁ ଥାନାରେ ଏକ ମାମଲା(ନଂ.୧୩/୨୧) ରୁଜୁ ହୋଇଛି। ଅଭିଯୋଗ ପାଇବା ପରେ ଅଭିଯୁକ୍ତ ପ୍ରେମିକ, ତାଙ୍କ ବାପା ଓ ପରିବାରର ଅନ୍ୟ ଜଣେ ସଦସ୍ୟଙ୍କୁ ପୋଲିସ ଥାନାକୁ ଆଣି ପଚରାଉଚୁରା କରିଛି।
ମୃତ ଯୁବତୀଙ୍କ ବାପାଙ୍କ ଅଭିଯୋଗ ଅନୁଯାୟୀ, ଅପାମରା ଗାଁର ଜଣେ ଯୁବକ ତାଙ୍କ ଝିଅଙ୍କୁ ପ୍ରେମ କରୁଥିଲେ ା ଏହାପରେ ବିବାହର ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ରଖିଥିଲେ। ଏଥିରେ ଯୁବତୀ ଜଣକ ଗର୍ଭବତୀ ହୋଇଥିଲେ । ଏକଥା ସେ ଘରେ କହିବା ପରେ ଯୁବତୀଙ୍କ ବାପା ବୁଧବାର ସକାଳେ ସମ୍ପୃକ୍ତ ଯୁବକଙ୍କ ଘରକୁ ଯାଇ ତାଙ୍କ ଝିଅକୁ ବିବାହ କରିବାକୁ ଦାବି କରିଥିଲେ। ହେଲେ ଯୁବକଙ୍କ ପରିବାର ଲୋକେ ଏଥିରେ ରାଜି ନ ହୋଇ ତାଙ୍କୁ ମାରପିଟ କରି ବିଦା କରିଦେଇଥିଲେ। ଏ ନେଇ ସେ ଦେଓଗଁା ଥାନାରେ ଅଭିଯୋଗ କରିବା ପରେ ଏକ ମାମଲା(ନଂ.୧୭୦/୨୧) ରୁଜୁ ହୋଇଥିଲା।
ପରେ ଯୁବତୀ ଜଣକ ସମ୍ପୃକ୍ତ ଯୁବକଙ୍କ ଘରକୁ ଯାଇ ବିବାହ ପାଇଁ ଜିଦ୍ ଧରିଥିଲେ। ତାଙ୍କୁ ମଧ୍ୟ ମାରପିଟ କରି ପ୍ରେମିକଙ୍କ ପରିବାର ଲୋକେ ଫେରାଇ ଦେଇଥିଲେ। ଯୁବତୀଙ୍କୁ ପ୍ରେମିକଙ୍କ ଘର ପଛପଟ ବାଡିରୁ ମୁମୂର୍ଷୁ ଅବସ୍ଥାରେ ଉଦ୍ଧାର କରାଯାଇଥିଲା। ଯୁବକ ତାଙ୍କୁ ବିଷ ପିଆଇ ଦେଇଥିବା ଯୁବତୀ ତାଙ୍କ ଘର ଲୋକଙ୍କୁ କହିଥିଲେ। ପରିବାର ଲୋକେ ଝିଅକୁ ଗୁରୁତର ଅବସ୍ଥାରେ ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ହସ୍ପିଟାଲକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପରିବାର ଲୋକେ ମୃତଦେହ ଥାନାକୁ ଆଣି ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ। ଅପରପକ୍ଷେ ମିଥ୍ୟା ଅଭିଯୋଗ କରି ଆମକୁ ଫସାଇ ଦେବା ପାଇଁ ଯୁବତୀଙ୍କ ପରିବାର ଲୋକେ ଉଦ୍ୟମ କରିଛନ୍ତି ବୋଲି ଯୁବକଙ୍କ ପରିବାର ପକ୍ଷରୁ ଥାନାରେ ଏତଲା ଦିଆଯାଇଛି। ଏହି ଅଭିଯୋଗକୁ ଭିତ୍ତି କରି ଅନ୍ୟ ଏକ ମାମଲା(ନଂ.୧୭୧/୨୧) ରୁଜୁ ହୋଇଛି।
