ସୁନ୍ଦରଗଡ଼/ନୂଆଗାଁ, ୨୬।୪(ଡି.ଏନ୍.ଏ.): ସୁନ୍ଦରଗଡ଼ ଜିଲା ନୂଆଗାଁ ବ୍ଲକ ହାତୀବାରି ଥାନା ଅନ୍ତର୍ଗତ ତାଇନ୍ଦା ଗଞ୍ଜୁବସ୍ତିରେ ବୁଧବାର ଜମିବାଡ଼ି ବିବାଦକୁ ନେଇ ଜଣେ ଯୁବକଙ୍କୁ ହତ୍ୟା କରାଯାଇଛି। ମୃତକ ହେଲେ ଜଗେଶ୍ୱର ସିଂ (୩୪)। ହତ୍ୟାକାଣ୍ଡରେ ସମ୍ପୃକ୍ତ ୩ମହିଳାଙ୍କ ସମେତ ୭ଜଣଙ୍କୁ ପୋଲିସ ଗିରଫ କରିଛି।
ତାଇନ୍ଦା ଗଞ୍ଜୁବସ୍ତିରେ ରହୁଥିବା ଜଗେଶ୍ୱରଙ୍କ ସହିତ ତାଙ୍କ ବଂଶର ଲଳିତ ସିଂ, ରମେଶ ସିଂଙ୍କ ଜମିବିବାଦ ଲାଗିରହିଥିଲା। ଏକ ଆମ୍ବଗଛ ଜଗେଶ୍ୱର ଓ ଲଳିତ ଉଭୟଙ୍କ ଜମିହିଡ଼ରେ ରହିଥିଲା। ତେବେ ଏହି ଗଛ ପ୍ରକୃତରେ କାହାର ସେ ନେଇ ବୁଧବାର ସକାଳେ ବୀରମିତ୍ରପୁର ରେଞ୍ଜର ଓ ସୋରଡ଼ା ରାଜସ୍ବ ନିରୀକ୍ଷକ ଉକ୍ତ ଗ୍ରାମକୁ ଯାଇ ମାପଚୁପ କରିଥିଲେ। ଉଭୟ ପରିବାରକୁ ବୁଝେଇ ଆସିଥିଲେ କି ଗଛଟି ଉଭୟଙ୍କ ଜମିହିଡ଼ରେ ଅଛି। ତେଣୁ ଗଛଟି ଉଭୟଙ୍କ ଭାଗରେ ଅଧା ଲେଖାଏ ପଡ଼ିବ। ତେଣୁ ସେମାନେ ଗଣ୍ଡଗୋଳରୁ ନିବୃତ ରହି ମିଳିମିଶି ରହିବାକୁ ଉଭୟ ପରିବାରକୁ ବୁଝାଇ ଆସିଥିଲେ। ତେବେ ରେଞ୍ଜର ଓ ରାଜସ୍ବ ନିରୀକ୍ଷକ ଚାଲିଯିବା ପରେ ଅପରାହ୍ନ ଦୁଇଟାରେ ପୁଣି ଉଭୟ ପରିବାର ଭିତରେ ଝଗଡା ଆରମ୍ଭ ହୋଇଥିଲା। ଏଥିରେ ଲଳିତ, ତାଙ୍କ ଭାଇ ରମେଶ ଏବଂ କେତେକ ମହିଳା ଆସି ଜଗେଶ୍ୱରଙ୍କୁ ଲାଠି ଓ ପଥରରେ ଆକ୍ରମଣ କରିଥିଲେ। ଫଳରେ ଜଗେଶ୍ୱରଙ୍କ ମୁଣ୍ଡ, କାନରେ ଗଭୀରକ୍ଷତ ହେବା ସହ ରକ୍ତସ୍ରାବ ହୋଇଥିଲା। ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା। ଖବରପାଇ ହାତୀବାରି ଥାନା ଅଧିକାରୀ ବୀରକିଶୋର ମଲ୍ଲିକ, ନୂଆଗାଁ ଫାଣ୍ଡି ଅଧିକାରୀ ହରିହର ଦାସ ସାଇଣ୍ଟିଫିକ୍ ଦଳ ସହ ଯାଇ ଘଟଣାର ତଦନ୍ତ କରିଛନ୍ତି। ଏହି ଘଟଣା ପରେ ପୋଲିସ ଲଳିତ, ରମେଶ, ୨ ବୟସ୍କ ବ୍ୟକ୍ତି ଓ ୩ ମହିଳାଙ୍କୁ ଗିରଫ କରିଛି। ପୋଲିସ ମୃତଦେହ ଜବତ କରିଛି। ଗୁରୁବାର ମୃତଦେହ ବ୍ୟବଚ୍ଛେଦ ହେଲା ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ପୋଲିସ କହିଛି।