ଲୋଇସିଂହା,୨୧।୮(ଡି.ଏନ୍.ଏ.): ସ୍ବାମୀ ନିର୍ଯାତନା ସହି ନ ପାରି ବଲାଙ୍ଗୀର ଜିଲା ଲୋଇସିଂହା ଥାନା ଆଗଲପୁର ବ୍ଲକ ବାଇଗଣଖାରି ଗ୍ରାମକୁ ଶିଶୁକନ୍ୟାକୁ ଧରି ଚାଲି ଆସିଥିଲେ ପୂର୍ଣ୍ଣିମା ନାଗ। ନିର୍ଯାତନା ବେଳକୁ ବେଳ ଏପରି ଅସହ୍ୟ ହେଲା ଯେ, ପୂର୍ଣ୍ଣିମା ଆଉ ସ୍ବାମୀଙ୍କ ପାଖକୁ ଫେରିବାକୁ ଚାହୁଁନାହାନ୍ତି l ଅପରପକ୍ଷେ ସ୍ତ୍ରୀକୁ ଫେରାଇ ଆଣିବା ପାଇଁ ବହୁ ବୁଝାଶୁଝା କରି ନିରାଶ ହୋଇଥିଲେ ବରଗଡ଼ ଜିଲା ବିଜେପୁର ଥାନା ବୁରୋମୁଣ୍ଡା ଗାଁର ସ୍ବାମୀ ମନୋଜ କୁମ୍ଭାର । ଶେଷରେ ସ୍ତ୍ରୀଙ୍କୁ ପାଇବା ଲାଗି ଜଣେ ସମ୍ପର୍କୀୟଙ୍କ ସହାୟତାରେ ଗତ ୧୭ ତାରିଖରେ ମନୋଜ ତାଙ୍କ ନାବାଳକ ଶାଳକଙ୍କୁ ଅପହରଣ କରିଥିଲେ। ଏନେଇ ପୂର୍ଣ୍ଣିମାଙ୍କ ପରିବାର ଲୋକେ ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ପୋଲିସ ତଦନ୍ତ ଆରମ୍ଭ କରିଥିଲା।
ଅନ୍ୟପକ୍ଷେ ମନୋଜ ଅପହୃତ ଶାଳକଙ୍କୁ ସମ୍ବଲପୁର, ବରଗଡ଼ରେ ରହୁଥିବା ସମ୍ପର୍କୀୟଙ୍କ ଘରେ ରଖିଥିଲେ। ଶନିବାର ସନ୍ଧ୍ୟାରେ ମନୋଜ ଶାଳକଙ୍କୁ ଲୋଇସିଂହା ଥାନା ଅଧୀନ ଝାରବନ୍ଧଲି ଗ୍ରାମକୁ ଆଣି ଜଣଙ୍କ ଘରେ ରଖିଥିଲେ। ପରେ ମନୋଜ ଆଶ୍ରୟ ଦେଇଥିବା ଘରର ଜଣେ ଯୁବକଙ୍କ ସହ ନିଜ ଗାଁକୁ ଯାଇ ଝାରବନ୍ଧଲିକୁ ଫେରୁଥିଲେ। ସେତିକିବେଳେ ସଲେଭଟା-ଆଗଲପୁର ରାସ୍ତାର ବାବୁଫାସଡରେ ଲୋଇସିଂହା ପୋଲିସ ହାବୁଡ଼ରେ ମନୋଜ ଧରାପଡିଥିଲେ । ମନୋଜଙ୍କୁ ପୋଲିସ ପଚରାଉଚରା ପରେ ଅପହୃତ ନାବାଳକ ଝାରବନ୍ଧଲିରେ ଥିବା ପୋଲିସ ଜାଣିବାକୁ ପାଇଥିଲା। ପରେ ପୋଲିସ ସେଠାରୁ ନାବାଳକଙ୍କୁ ଉଦ୍ଧାର କରିଥିଲା। ନାବାଳକ ଓ ଅଭିଯୁକ୍ତଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇଛି । ଅଭିଯୁକ୍ତ ମନୋଜ କୁମ୍ଭାରଙ୍କୁ ରବିବାର କୋର୍ଟ ଚାଲାଣ କରାଯାଇଥିବା ଆଇଆଇସି ସଂଗ୍ରାମ ପଟ୍ଟନାୟକ କହିଛନ୍ତି। ଏହି ଘଟଣାରେ ଅଧିକ ତଦନ୍ତ ଜାରି ରହିଥିବା ସେ କହିଛନ୍ତି । ଏନେଇ ଲୋଇସିଂହା ଥାନାରେ ଏକ ମାମଲା (ନଂ ୨୬୬/୨୨) ରୁଜୁ ହୋଇଛି।
