ବ୍ରହ୍ମପୁର ଅଫିସ,୫।୯: ମହିଳାଙ୍କୁ ଅସଦାଚରଣ କରି ସୁନା ଚେନ୍ ଲୁଟ୍ ଘଟଣାରେ ବଡ଼ବଜାର ଥାନା ପୋଲିସ ସୋମବାର ଜଣେ ଅଭିଯୁକ୍ତଙ୍କୁ ଗିରଫ କରିଛି। ଅଭିଯୁକ୍ତ ହେଲେ ସୁଶୀଲ କୁମାର ମହାପାତ୍ର(୪୧)। ଏନେଇ ପୋଲିସ ଏକ ମାମଲା (ନଂ.୨୨୮/୨୨) ରୁଜୁ କରି ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି। ଅନ୍ୟପକ୍ଷେ ମହିଳାଙ୍କ ସୁନା ଚେନ୍ ପୋଲିସ ଅଭିଯୁକ୍ତଙ୍କଠାରୁ ଜବତ କରି ନ ଥିବା ଜଣାପଡିଛି। ପୋଲିସ ଏହି ଘଟଣାର ତଦନ୍ତ ଜାରି ରଖିଛି। ଏଥିରେ ସମ୍ପୃକ୍ତ ଥିବା ଅନ୍ୟ ଅଭିଯୁକ୍ତମାନଙ୍କୁ ଗିରଫ କରାଯିବ ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି।
ଘଟଣାରୁ ପ୍ରକାଶ ଯେ, ଘର କାନ୍ଥ ନିର୍ମାଣକୁ ନେଇ ଅଭିଯୁକ୍ତଙ୍କ ପରିବାର ତାଙ୍କ ପଡୋଶୀଙ୍କୁ ବିଭିନ୍ନ ପ୍ରକାର ହଇରାଣ କରୁଥିଲେ। ଗତ ଶନିବାର ଏହି ବିବାଦକୁ କେନ୍ଦ୍ରକରି ଉଭୟ ପଡୋଶୀଙ୍କ ମଧ୍ୟରେ କଥା କଟାକଟି ହୋଇଥିଲା। ଏଥିରେ ସୁଶୀଲ ଓ ତାଙ୍କ ପରିବାର ଅନ୍ୟ ସଦସ୍ୟ ପଡୋଶୀ ମହିଳାଙ୍କୁ ଟଣାଓଟରା କରିଥିଲେ। ଏପରିକି ମହିଳାଙ୍କ ବେକରୁ ଏକ ସୁନା ଚେନ୍ ଲୁଟି ନେଇଥିବା ଅଭିଯୋଗ ହୋଇଛି। ଏନେଇ ଉଭୟଙ୍କ ପକ୍ଷରୁ ଥାନାରେ ପୃଥକ ଭାବେ ମାମଲା ରୁଜୁ ହୋଇଥିଲା। ସୋମବାର ପୋଲିସ ସୁଶୀଲଙ୍କୁ ଗିରଫ କରିଛି।