ଲହୁଣୀପଡ଼ା,୧୯।୨(ଡି.ଏନ୍.ଏ.): ସୁନ୍ଦରଗଡ଼ ଜିଲା ମହୁଲପଦା ଥାନା ଅଧୀନ ମରଚିଢିହି ଗ୍ରାମରେ ଜଣେ ଯୁବକ ଅନ୍ୟ ଜଣେ ଯୁବକଙ୍କୁ ପଥରରେ ଛେଚି ହତ୍ୟା କରିଛନ୍ତି। ଏହାକୁ ଆତ୍ମହତ୍ୟାର ରୂପ ଦେବା ପାଇଁ ମୃତଦେହକୁ ଜଙ୍ଗଲର ଏକ ଗଛରେ ଟାଙ୍ଗି ଦେଇଥିଲେ ଅଭିଯୁକ୍ତ। ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବଣାଇ ଉପଖଣ୍ଡ ଡାକ୍ତରଖାନାକୁ ପଠାଇଥିଲା। ଏହା ସହିତ ଅଭିଯୁକ୍ତ ଯୁବକଙ୍କୁ ଅଟକ ରଖି ପଚରାଉଚରା ଚଳାଇଛି।
ମିଳିଥିବା ସୂଚନା ମୁତାବକ, ମରିଚିଡିହି ଗ୍ରାମର ତୋଳା ନାଏକ ଓ ବାବୁଲି ଗିରି ଉଭୟେ ନିକଟସ୍ଥ ଜଙ୍ଗଲକୁ ଯାଇଥିଲେ। ଜଙ୍ଗଲରେ କୌଣସି କଥାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ବାବୁଲି ପଥରରେ ଛେଚି ତୋଳାଙ୍କୁ ହତ୍ୟା କରିଥିଲେ। ଏହାକୁ ଆତ୍ମହତ୍ୟାର ରୂପ ଦେବା ପାଇଁ ଜଙ୍ଗଲରେ ଏକ ଗଛରେ ମୃତଦେହ ଟାଙ୍ଗି ଦେଇଥିଲେ। ସନ୍ଧ୍ୟାରେ ବାବୁଲି ଗ୍ରାମକୁ ଆସିଥିଲେ। ସେ ଗ୍ରାମବାସୀଙ୍କୁ କହିଥିଲେ, ଜଙ୍ଗଲରେ ଏକ ଗଛରେ ତୋଳାଙ୍କ ମୃତଦେହ ଝୁଲୁଛି। କିନ୍ତୁ ଗ୍ରାମବାସୀ ସନ୍ଦେହ କରିଥିଲେ। ଦୁଇଜଣ ସାଙ୍ଗ ହୋଇ ଯାଇଥିଲେ। ଏପରି ଘଟଣା କେମିତି ହେଲା ସନ୍ଦେହ କରି ପୋଲିସକୁ ଜଣାଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ତଦନ୍ତ ବେଳେ ବାବୁଲି ପୋଲିସ ଆଗରେ ତୋଳାଙ୍କୁ ହତ୍ୟା କରି ଗଛରେ ଟାଙ୍ଗି ଦେଇଥିବା ସ୍ବୀକାର କରିଥିଲା। ପରେ ମହୁଲପଦା ପୋଲିସ ଅଭିଯୁକ୍ତ ବାବୁଲିଙ୍କୁ ଅଟକ ରଖି ତଦନ୍ତ ଚଳାଇଛି।
