ମୁମ୍ବାଇ,୧୭।୯: କୋଭିଡ୍ ମହାମାରୀ ସମୟରେ କେନ୍ଦ୍ର ମନ୍ତ୍ରୀ ନୀତିନ ଗଡ଼କରୀ ନିଜ ସମୟକୁ ଉପଯୋଗ କରିବା ପାଇଁ ଅନଲାଇନ ଲେକଚର ଦେଇଥିଲେ। ଏଥି ଯୋଗୁ ତାଙ୍କୁ ମାସିକ ୪ ଲକ୍ଷ ଟଙ୍କା ଦେଉଥିଲା ୟୁଟ୍ୟୁବ। ଏ ନେଇ ହରିୟାଣାର ଏକ ଇଭେଣ୍ଟରେ ଯୋଗଦେଇ କେନ୍ଦ୍ର ସଡକ ପରିବହନ ଓ ରାଜରାସ୍ତା ମନ୍ତ୍ରୀ ଗଡ଼କରୀ କହିଛନ୍ତି।
ଦିଲ୍ଲୀ-ମୁମ୍ବାଇ ଏକ୍ସପ୍ରେସଓ୍ବେର ଚାଲିଥିବା ନିର୍ମାଣ କାର୍ଯ୍ୟ ତଦାରଖ କରିବା ପରେ ବରିଷ୍ଠ ଭାଜପା ନେତା କହିଥିଲେ, କୋଭିଡ୍-୧୯ ସମୟରେ ମୁଁ ଦୁଇଟି କାର୍ଯ୍ୟ କରିଥିଲି। ଘରେ ରୋଷେଇ ଆରମ୍ଭ କରିବା ସହ ଭିଡିଓ କନଫରେନ୍ସ ଜରିଆରେ ଲେକଚର ଦେଇଥିଲି। ମୁଁ ଅନ୍ଲାଇନରେ ବହୁ ଲେକଚର ଦେଇଥିଲି, ଯାହାକୁ ୟୁଟ୍ୟୁବରେ ଅପଲୋଡ୍ କରାଯାଇଥିଲା। ଭିଡିଓଗୁଡ଼ିକୁ ପ୍ରବଳ ଭ୍ୟୁଅର୍ସ ମିଳିବାରୁ ୟୁଟ୍ୟୁବ ମୋତେ ମାସିକ ୪ ଲକ୍ଷ ଟଙ୍କା ଦେଉଛି। ଏହି କାର୍ଯ୍ୟକ୍ରମରେ ହରିୟାଣା ମୁଖ୍ୟମନ୍ତ୍ରୀ ମନୋହର ଲାଲ ଖଟର ଓ ଏମ୍ପି ରାଓ ଇନ୍ଦ୍ରଜିତ ସିଂ ଉପସ୍ଥିତ ଥିଲେ। ଉଲ୍ଲେଖଯୋଗ୍ୟ, ଦିଲ୍ଲୀ-ମୁମ୍ବାଇ ଏକ୍ସପ୍ରେସଓ୍ବେର ନିର୍ମାଣ ଲାଗି ୯୫ ହଜାର କୋଟି ଟଙ୍କା ବ୍ୟୟ ବରାଦ କରାଯାଇଛି। ୨୦୨୩ ସୁଦ୍ଧା ଏହି ଏକ୍ସପ୍ରେସଓ୍ବେର ନିର୍ମାଣ କାର୍ଯ୍ୟ ଶେଷ କରାଯିବାକୁ ଲକ୍ଷ୍ୟ ରଖାଯାଇଛି।