ପିପିଲି,୨୩।୧(ଡି.ଏନ୍.ଏ.):ନିମାପଡ଼ା ଅଞ୍ଚଳର ଯୁବଚାଷୀ ପରେଶ ଗୁରୁ। ସେ ଜଣେ ଡ୍ରାଇଭର ହୋଇଥିବାବେଳ ୟୁଟ୍ୟୁବ ଦେଖି ଚାଷକୁ ପେସା ଭାବରେ ଗ୍ରହଣ କରି ସ୍ବାବଲମ୍ବୀ ହୋଇପାରିଛନ୍ତି। ସେ ଅଳ୍ପ ଜମିରେ କିଭଳି ଚାଷ କରାଯାଇ ପାରିବ, ସେନେଇ ପରୀକ୍ଷାମୂଳକ ଭାବରେ କଞ୍ଚା କଳା ହଳଦୀ ଚାଷ କରି ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି। ଏଥିସହ ରାସାୟନିକ ସାର ପ୍ରୟୋଗ ନ କରି ଜୈବିକ ପଦ୍ଧତିରେ ଚାଷ କରି ବେଶ୍ ଲାଭବାନ ହୋଇ ପାରିଛନ୍ତି, ଯାହାକି ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛି।
ଦିନକୁ ଦିନ ଚାଷରୁ ମୁହଁ ଫେରାଉଛନ୍ତି ଚାଷୀ। ବାତ୍ୟା, ବନ୍ୟା ଭଳି ଦୈବଦୁର୍ବିପାକ ଘଟୁଥିବା ନଜିରକୁ ଆସିଛି। ତେବେ ଏଭଳି ସମୟରେ ଉଚ୍ଚ ଶିକ୍ଷିତ ଯୁବକ ଚାକିରି ପଛରେ ନ ଦୌଡ଼ି ଚାଷକୁ ନିଜର ଜୀବନ ଜୀବିକା ଭାବରେ ଗ୍ରହଣ କରିଛନ୍ତି। ପିପିଲି ବ୍ଲକ ନିକଟବର୍ତ୍ତୀ ନିମାପଡ଼ା ପାର୍ବତୀପୁର ଅଞ୍ଚଳର ପରେଶ ଗୁରୁ ଓରଫ ପପୁଙ୍କ ଶିକ୍ଷାଗତ ଯୋଗ୍ୟତା ମାଟ୍ରିକ ପାସ୍। ଜେସିବି ଡ୍ରାଇଭର ଓ ସୁପରଭାଇଜର ଭାବରେ କ୍ୟାରିୟର କରିଥିବା ପରେଶ କିନ୍ତୁ ୟୁଟ୍ୟୁବ ଦେଖି ଚାଷ କରିବାକୁ ଆଗ୍ରହ ଦେଖାଇଥିଲେ। ପରୀକ୍ଷା ମୂଳକ ଭାବରେ ମାତ୍ର ୩ ଡିସିମିଲ ଜାଗାରେ କଳା ହଳଦୀ ଚାଷକୁ ନିଜର ବୃତ୍ତି ଭାବେ ଗ୍ରହଣ କରି ଭଲ ଅର୍ଥ ଉପାର୍ଜନ କରିବାରେ ସକ୍ଷମ ହୋଇପାରିଛନ୍ତି। ଚାଷ କରି ହଜାର ହଜାର ଟଙ୍କା ରୋଜଗାର କରୁଛନ୍ତି। ସେ ପୁଣି ରାସାୟନିକ ସାର ପ୍ରୟୋଗ ନ କରି ଜୈବିକ ସାର ଯଥା ଗୋବର ଖତ, ନିମ ତେଲ, କରଞ୍ଜ ତେଲ ବ୍ୟବହାର କରିଥାନ୍ତି। ଆବଶ୍ୟକ ଅନୁସାରେ ଜମିରେ ବିଭିନ୍ନ ଫସଲ କରନ୍ତି। ଏବେ ଚାଷ ଜମିରେ କଳା ହଳଦୀ ସମେତ କଲିକତା ବରକୋଳି ମଧ୍ୟ ଚାଷ କରିଛନ୍ତି ପରେଶ। ବିଶେଷକରି ଏହି କଳା କଞ୍ଚା ହଳଦୀର ବଜାରରେ ମୂଲ୍ୟ ୧ କେଜି ପ୍ରତି ଅଢେଇ ହଜାରରୁ ୫ ହଜାର ଟଙ୍କା ପର୍ଯ୍ୟନ୍ତ ରହିଥିବାବେଳେ ଏହା ଔଷଧରେ ବ୍ୟବହାର କରାଯାଉଥିବାରୁ ଏହାର ଚାହିଦା ରହିଛି ବୋଲି ସେ କହିଛନ୍ତି। ନିଜ ଜମିରେ ଚାଷ କରି ପରେଶଙ୍କ ଅଞ୍ଚଳରେ ଲୋକପ୍ରିୟତା ବୃଦ୍ଧି ପାଇଛି। ସେପଟେ ସରକାରଙ୍କ ପକ୍ଷରୁ ଚାଷୀଙ୍କ ପାଇଁ ଅନେକ ସାହାଯ୍ୟ ସହଯୋଗ ଯୋଗାଇ ଦିଆଯାଉଥିବାବେଳେ ପରେଶଙ୍କୁ ସରକାରୀ ସହାୟତା ଯୋଗାଇ ଦିଆଗଲେ ସେ ଚାଷରେ ଆହୁରି ଉନ୍ନତି କରିପାରନ୍ତେ ବୋଲି ଗ୍ରାମବାସୀ କହିଛନ୍ତି।