କେନ୍ଦୁଝର,୧୩ା୪(ସ୍ବ.ପ୍ର.): କେନ୍ଦୁଝର ବନ ବିଭାଗ ବେଆଇନ ଭାବେ ବିରଳ ପ୍ରଜାତିର ଶୁଆ ରଖିଥିବା ଅଭିଯୋଗରେ ଜଣେ ଯୁବକଙ୍କୁ ଗିରଫ କରି କୋର୍ଟ ଚାଲାଣ କରିଛି। ତାଙ୍କ ନାମ ଚିନ୍ମୟ ମହାନ୍ତ (୨୫) ଏବଂ ତାଙ୍କ ଘର ବାଂଶପାଳ ବ୍ଲକ କୁମୁଣ୍ଡି ଗ୍ରାମରେ ବୋଲି ଜଣାପଡ଼ିଛି। ଏହା ଆଲେକ୍ସାଣ୍ଡ୍ରିନ ପରକିଟ (ନାହକ ଶୁଆ) ବୋଲି ବନ ବିଭାଗ କହୁଛି। ଏହି କଥା କୁହା ଶୁଆ ଲୋପ ପାଇବାକୁ ବସିଥିବାରୁ ଏହା ସିଡ୍ୟୁଲଡ ୨ ବିଭାଗରେ ରଖାଯାଇଛି।
ସେ କିଛି ଦିନ ହେବ ଶୁଆକୁ ଧରି ଭିଡିଓ ପ୍ରସ୍ତୁତ କରି ୟୁଟ୍ୟୁବରେ ଛାଡୁଥିଲେ। କେମିତି ଶୁଆ କଥା କହୁଛି ଓ କେମିତି କାମୁଡିବ ନାହିଁ ଶୀର୍ଷକ ଦୁଇଟି ଭିଡିଓ ପ୍ରସ୍ତୁତ କରି ଛାଡ଼ିଥିଲେ। ଏହି ବିରଳ ପ୍ରଜାତିର ଶୁଆ ପ୍ରତି ନିର୍ଯାତନା ଦିଆଯାଉଥିବା ନେଇ ଖୋର୍ଦ୍ଧା ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଶୁଭେନ୍ଦୁ ମଲ୍ଲିକ ପିସିସିଏଫ୍ (ବନ୍ୟପ୍ରାଣୀ)ଙ୍କ ନିକଟରେ ଅଭିଯୋଗ କରିବା ପରେ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ବୋଲି ଜଣାପଡିଛି।
ଭିଡିଓରେ ଶୁଆର କାନରେ ସୋରିଷ ତେଲ ପକାଇବା, ଲୁହା ରଡ୍କୁ କାମୁଡେଇବା ଭଳି ଦୃଶ୍ୟ ରେକର୍ଡ କରି ସେ ୟୁଟ୍ୟୁବ୍ରେ ଛାଡ଼ିଥିଲେ। ଯାହାକି ବନ୍ୟପ୍ରାଣୀ ସୁରକ୍ଷା ଆଇନ ୧୯୭୨ର ଖିଲାପ ଅଟେ। ସେହିପରି ଶୁଆକୁ ଧରି ନିର୍ଯାତନା ଦେବା ମଧ୍ୟ ଆଇନ ବିରୋଧୀ। ଏଣୁ ଏନେଇ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଚିଠି କରିଥିଲେ। କେନ୍ଦୁଝର ବନ ବିଭାଗ ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରି ଗିରଫ କରିଛନ୍ତି ବୋଲି ଶୁଭେନ୍ଦୁ ମଲ୍ଲିକ କହିଛନ୍ତି।
