ମୁମ୍ବାଇ,୧।୨: ସୋସିଆଲମିଡିଆ ଇନ୍ଫ୍ଲୁଏନ୍ସର ତଥା ୟୁଟ୍ୟୁବର ‘ହିନ୍ଦୁସ୍ଥାନୀ ଭାଉ’ ଭାବେ ଜଣାଶୁଣା ବିକାଶ ପାଠକଙ୍କୁ ଗିରଫ କରିଛି ଧାରାବି ପୋଲିସ। ଛାତ୍ର ଆନ୍ଦୋଳନକୁ ଉସୁକାଇବା ଅଭିଯୋଗରେ ତାଙ୍କୁ ଗିରଫ କରାଯାଇଛି। ଅଭିଯୋଗ ଅନୁଯାୟୀ, ଦଶମ ଓ ଦ୍ୱାଦଶ ଶ୍ରେଶୀର ଅଫ୍ଲାଇନ୍ ପରୀକ୍ଷା ବାତିଲ କରିବା ଦାବିରେ ଛାତ୍ରୀଛାତ୍ରଙ୍କୁ ମହାରାଷ୍ଟ୍ର ଶିକ୍ଷା ମନ୍ତ୍ରୀ ବର୍ଷା ଗାଏକ୍ୱାଡଙ୍କ ବାସଭବନ ନିକଟରେ ଏକତ୍ରିତ ହେବାକୁ କହିଥିଲେ।
“ସୋସିଆଲମିଡିଆ ଇନ୍ଫ୍ଲୁଏନ୍ସର ହିନ୍ଦୁସ୍ଥାନୀ ଭାଉଙ୍କୁ ଧାରବିରେ ଛାତ୍ରୀଛାତ୍ରଙ୍କ ଆନ୍ଦୋଳନରେ ସମ୍ପୃକ୍ତି ନେଇ ଗିରଫ କରାଯାଇଛି। କୋଭିଡ୍-୧୯କୁ ଦୃଷ୍ଟିରେ ରଖି ଦଶମ ଓ ଦ୍ୱାଦଶ ଅନଲାଇନ ପରୀକ୍ଷା କରିବା ଦାବି କରୁଛନ୍ତି ଆନ୍ଦୋଳନରତ ଛାତ୍ରୀଛାତ୍ର।
ହିନ୍ଦୁସ୍ଥାନୀ ଭାଉ ଏକ ଭିଡିଓ ଶେୟାର କରିଥିଲେ, ଯେଉଁଥିରେ ସେ ଛାତ୍ରୀଛାତ୍ରଙ୍କୁ ଆନ୍ଦୋଳନକୁ ଓହ୍ଲାଇବା ପାଇଁ ପ୍ରବର୍ତ୍ତାଇ ଥିଲେ। ଦଙ୍ଗା, ମହାରାଷ୍ଟ୍ର ପୋଲିସ ଆଇନ, ବିପର୍ଯ୍ୟୟ ନିୟନ୍ତ୍ରଣ ଆଇନ ଓ ଆଇପିସିର ବିଭିନ୍ନ ଦଫାରେ ତାଙ୍କ ବିରୋଧରେ ମାମଲା ରୁଜୁ କରାଯାଇଛି। ଏ ଘଟଣାରେ ଧାରବି ପୋଲିସ ଇକରାର ଖାନ ନାମକ ଅନ୍ୟ ଜଣେ ବ୍ୟକ୍ତିଙ୍କୁ ମଧ୍ୟ ଗିରଫ କରାଯାଇଛି।
ଉଲ୍ଲେଖଯୋଗ୍ୟ, ଶତାଧିକ ଛାତ୍ରୀଛାତ୍ର ଅନଲାଇନ ପରୀକ୍ଷା ଦାବିରେ ସୋମବାର ମଧ୍ୟାହ୍ନରେ ଅଶୋକ ମିଲ ନାକାରେ ଆନ୍ଦୋଳନ କରିଥିଲେ। ଆନ୍ଦୋଳନକାରୀଙ୍କୁ ଘଉଡାଇବା ପାଇଁ ପୋଲିସକୁ ବାଟନ ଚାର୍ଜ କରିବାକୁ ପଡ଼ିଥିଲା।