ନୂଆଦିଲ୍ଲୀ,୭।୧୨: ହନିଟ୍ରାପ୍ ମାଧ୍ୟମରେ ଜଣେ ୟୁଟ୍ୟୁବର ଜଣେ ବ୍ୟବସାୟୀଙ୍କଠାରୁ ୮୦ଲକ୍ଷ ଟଙ୍କା ଲୁଟ୍ କରିଥିବା ଅଭିଯୋଗ ହୋଇଛି। ଜଣେ ବ୍ୟବସାୟୀଙ୍କ ଅଭିଯୋଗ ପରେ ଗୁରୁଗ୍ରାମ୍ ପୋଲିସ ସୋମବାର ବିଳମ୍ବିତ ରାତିରେ ୟୁଟ୍ୟୁବରଙ୍କୁ ଦିଲ୍ଲୀରୁ ଗିରଫ କରିଛି। ୨୨ବର୍ଷୀୟ ନାମ୍ରା କାଦିରଙ୍କୁ ପୋଲିସ ୪ଦିନିଆ ରିମାଣ୍ଡରେ ନେଇଛି। ନାମ୍ରା ତାଙ୍କ ସ୍ବାମୀଙ୍କ ସହିତ ମିଶି ହନିଟ୍ରାପ୍ ଜରିଆରେ ଏହି କଳା ବ୍ୟବସାୟ କରୁଥିଲେ। ସୂଚନାଯୋଗ୍ୟ, ନଭେମ୍ବର ୨୪ରେ ବାଦଶାହପୁରର ଜଣେ ବ୍ୟବସାୟୀ ଗୁରୁଗ୍ରାମର ସେକ୍ଟର-୫୦ ପୋଲିସ ଷ୍ଟେସନରେ ତାଙ୍କ ବିରୋଧରେ ଠକେଇ ହୋଇଥିବା ଅଭିଯୋଗ ଆଣିଥିଲେ। ଏହାପରେ ୟୁଟ୍ୟୁବର ନାମ୍ରା କାଦିରଙ୍କ କାରନାମା ବିଷୟରେ ସାମ୍ନାକୁ ଆସିଥିଲା। କେବଳ ସେତିକି ନୁହେଁ, ନାମ୍ରା ଉକ୍ତ ବ୍ୟବସାୟୀଙ୍କୁ ମିଥ୍ୟା ବଳାତ୍କାର ମାମଲାରେ ମଧ୍ୟ ଫସାଇଦେବାକୁ କହି ଧମକ ଦେଇଥିଲେ। ଏହି କାର୍ଯ୍ୟରେ କାଦିରଙ୍କ ସ୍ବାମୀ ମଧ୍ୟ ଜଡିତ ଥିଲେ। ୟୁଟ୍ୟୁବରେ ନାମ୍ରାଙ୍କ ୬ଲକ୍ଷରୁ ଅଧିକ ଫଲୋଅର୍ସ ରହିଛନ୍ତି।