ଢାକା,୧୬।୧୨: ବାଂଲାଦେଶ ନିର୍ବାଚନକୁ ନେଇ ଏକ ବଡ ଅପଡେଟ ଆସିଛି। ନୋବେଲ ବିଜେତା ତଥା ମଧ୍ୟବର୍ତ୍ତୀକାଳୀନ ସରକାରର ମୁଖ୍ୟ ମହମ୍ମଦ ୟୁନୁସ ନିର୍ବାଚନ ସମ୍ପର୍କରେ ସୂଚନା ଦେଇଛନ୍ତି। ଆସନ୍ତା ବର୍ଷ ଶେଷ କିମ୍ବା ୨୦୨୬ ଆରମ୍ଭରେ ସାଧାରଣ ନିର୍ବାଚନ ଅନୁଷ୍ଠିତ ହେବ ବୋଲି ସେ କହିଛନ୍ତି।
ଖବର ଅନୁଯାୟୀ, ତାରିଖ ସ୍ଥିର କରିବାକୁ ମଧ୍ୟବର୍ତ୍ତୀକାଳୀନ ସରକାରର ମୁଖ୍ୟ ମହମ୍ମଦ ୟୁନୁସଙ୍କ ଉପରେ ବହୁ ଚାପ ରହିଥିଲା। ମହମ୍ମଦ ୟୁନୁସ କହିଛନ୍ତି ଯେ ନିର୍ବାଚନ ତାରିଖ ୨୦୨୫ଶେଷ କିମ୍ବା ୨୦୨୬ ର ପ୍ରଥମାର୍ଦ୍ଧ ସୁଦ୍ଧା ସ୍ଥିର ହୋଇପାରିବ। ସେ କହିଛନ୍ତି ମୁଁ ନିର୍ବାଚନ ବ୍ୟବସ୍ଥା ପୂର୍ବରୁ ସଂସ୍କାର କରାଯିବା ଉଚିତ ବୋଲି ମୁଁ ସର୍ବଦା ଜିଦ ଧରିଛି।
ବହୁ ସୁଧାରର ତଦାରଖ କରିବା ପାଇଁ ୟୁନୁସ ଏକ କମିଶନ ଆରମ୍ଭ କରି କହିଛନ୍ତି ଯେ ନିର୍ବାଚନ ତାରିଖ ସ୍ଥିର କରିବା ରାଜନୈତିକ ଦଳର ସହମତି ଉପରେ ନିର୍ଭର କରେ। ସେ କହିଛନ୍ତି, ଯଦି ରାଜନୈତିକ ଦଳଗୁଡିକ ନିଖୁଣ ନିର୍ବାଚନ ତାଲିକା ଭଳି ସର୍ବନିମ୍ନ ସଂସ୍କାର ସହିତ ପୂର୍ବ ତାରିଖରେ ନିର୍ବାଚନ କରିବାକୁ ରାଜି ହୁଅନ୍ତି, ତେବେ ନଭେମ୍ବର ଶେଷ ସୁଦ୍ଧା ନିର୍ବାଚନ ହୋଇପାରେ।
୧୯୭୧ ମୁକ୍ତି ଯୁଦ୍ଧରେ ବାଂଲାଦେଶର ବିଜୟକୁ ଚିହ୍ନିତ କରି ବିଜୟ ଦିବସରେ ଦେଶକୁ ସମ୍ବୋଧିତ କରିବା ସମୟରେ ମହମ୍ମଦ ୟୁନୁସ ଏହି ସୂଚନା ଦେଇଛନ୍ତି। ବିଜୟ ଦିବସ ୧୬ ଡିସେମ୍ବର ୧୯୭୧କୁ ସ୍ମରଣ କରନ୍ତି, ଯେତେବେଳେ ପାକିସ୍ତାନ ସଶସ୍ତ୍ର ବାହିନୀର ଜେନେରାଲ ଆମୀର ଅବଦୁଲ୍ଲା ନୟାଜୀ ଏବଂ ୯୩,୦୦୦ ସୈନିକ ଭାରତୀୟ ସେନା ଏବଂ ମୁକ୍ତିି ବାହିନୀଙ୍କ ନିକଟରେ ଆତ୍ମସମର୍ପଣ କରିଥିଲେ। ବାଂଲାଦେଶର ସ୍ବାଧୀନତା ପାଇଁ ୯ ମାସ ପର୍ଯ୍ୟନ୍ତ ଏହି ଯୁଦ୍ଧ ହୋଇଥିଲା।
