ଢାକା,୨୭।୯: ବାଂଲାଦେଶରେ ଶେଖ ହାସିନା ସରକାରଙ୍କ ବିରୋଧରେ ଆନ୍ଦୋଳନ ସ୍ବୟଂଚାଳିତ ବା ଆପଣାଛାଏଁ ଆରମ୍ଭ ହୋଇ ନ ଥିଲା। ଏହାର ସ୍ପଷ୍ଟ ଅର୍ଥ ହେଉଛି ଯେ ଶେଖ ହାସିନାଙ୍କୁ ପ୍ରଧାନମନ୍ତ୍ରୀ ପଦରୁ ବହିଷ୍କାର କରିବା ପାଇଁ ଏକ ଷଡଯନ୍ତ୍ର କରାଯାଇଥିଲା, ଯାହାର ମାଷ୍ଟରମାଇଣ୍ଡଙ୍କ ସମ୍ପର୍କରେ ମହମ୍ମଦ ୟୁନୁସ ନିଜେ ସୂଚନା ଦେଇଛନ୍ତି।
ମିଳିତ ଜାତିସଂଘର ସାଧାରଣ ସଭାରେ ଭାଗ ନେବାକୁ ଯାଇଥିବା ମହମ୍ମଦ ୟୁନୁସ ନ୍ୟୁୟର୍କରେ ଏକ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ। ଏହି ସମ୍ମିଳନୀରେ ସେ ଶେଖ ହାସିନା ସରକାରକୁ ଅଡୁଆରେ ପକାଇବା ପାଇଁ ଷଡଯନ୍ତ୍ର କରିଥିବା ବ୍ୟକ୍ତିଙ୍କୁ ବିଶ୍ୱ ସହ ପରିଚିତ କରାଇଥିଲେ।
ମଙ୍ଗଳବାର, ଯେତେବେଳେ ମହମ୍ମଦ ୟୁନୁସ ନ୍ୟୁୟର୍କର କ୍ଲିଣ୍ଟନ ଗ୍ଲୋବାଲ ଇନିସିଏଟିଭରେ ଲୋକଙ୍କୁ ସମ୍ବୋଧିତ କରୁଥିଲେ, ସେତେବେଳେ ସେ ତାଙ୍କର ବିଶେଷ ସହାୟକ ମହଫୁଜ ଆଲାମଙ୍କ ପରିଚୟ ଦେଇଥିଲେ। ପରିଚୟ ସମୟରେ ମହମ୍ମଦ ୟୁନୁସ ମହଫୁଜ ଆଲାମଙ୍କୁ ବହୁତ ପ୍ରଶଂସା କରିଥିଲେ।
କହିଥିଲେ ଯେ ମହଫୁଜ ଆଲାମ ମଧ୍ୟ ଅନ୍ୟ ଯୁବକମାନଙ୍କ ପରି ଦେଖାଯାଉଛନ୍ତି, ଯାହାକୁ ଆପଣ ଚିହ୍ନି ପାରିବେ ନାହିଁ । ତଥାପି, ଯେତେବେଳେ ଆପଣ ସେମାନଙ୍କୁ କାମ କରୁଥିବାର ଦେଖିବେ, ଯେତେବେଳେ ଆପଣ ସେମାନଙ୍କ କଥା ଶୁଣିବେ, ନିଶ୍ଚୟ ଆଶ୍ଚର୍ଯ୍ୟ ହୋଇଯିବେ। ସେ ତାଙ୍କ ଭାଷଣ ମାଧ୍ୟମରେ ଦେଶର ଯୁବକମାନଙ୍କ ମଧ୍ୟରେ ଏକ ନୂତନ ଶକ୍ତି ଉତ୍ସ ଆଣିଛନ୍ତି। ସେ କହିଥିଲେ ଯେ ମହଫୁଜ ଆଲାମଙ୍କ ମନ ହିଁ ସମଗ୍ର ଆନ୍ଦୋଳନକୁ ଜନ୍ମ ଦେଇଛି। ସେ ଏହାକୁ ବାରମ୍ବାର ଅସ୍ବୀକାର କରନ୍ତି, କିନ୍ତୁ ସେ ଏହିପରି ଭାବେ ଜଣାଶୁଣା।
ମହମ୍ମଦ ୟୁନୁସ ଆହୁରି ମଧ୍ୟ କହିଛନ୍ତି ଯେ ସେମାନେ ହିଁ ନୂତନ ବାଂଲାଦେଶ ନିର୍ମାଣ କରୁଛନ୍ତି, ଆସନ୍ତୁ ସେମାନଙ୍କର ସଫଳତା କାମନା କରିବା। ସୂଚନା ଅନୁସାରେ, ଆମେରିକାର ପୂର୍ବତନ ରାଷ୍ଟ୍ରପତି ବିଲ କ୍ଲିଣ୍ଟନ ମଧ୍ୟ ଏହି ସମ୍ମିଳନୀରେ ଭାଗ ନେଇଥିଲେ।