ନୂଆଦିଲ୍ଲୀ,୧୯।୯: ୨୦୦୭ରେ ଇଲଂଣ୍ଡ ବିପକ୍ଷରେ ଖେଳାଯାଉଥିବା ଟି-୨୦ ମ୍ୟାଚ୍ରେ ଭାରତୀୟ କ୍ରିକେଟ ଟିମ୍ର ପୂର୍ବତନ ଅଲରାଉଣ୍ଡର ଯୁବରାଜ ସିଂହ ଗୋଟିଏ ଓଭରରେ ୬ଟି ଛକା ମାରି ରେକର୍ଡ କରିଥିଲେ। ଶନିବାର ଉକ୍ତ ରେକର୍ଡକୁ ୧୩ ବର୍ଷ ପୁରିଛି।
ଷ୍ଟୁଆର୍ଟ ବ୍ରୋଡ୍ଙ୍କ ପ୍ରତିଟି ବଲ୍ରେ ଯୁବରାଜ ଛକା ମାରିବାର ଉକ୍ତ ରେକର୍ଡ ଆଜିବି ପ୍ରଶଂସକଙ୍କ ମାନସପଟରୁ ହଟିନାହିଁ। ନିଜେ ଯୁବରାଜ ମଧ୍ୟ ଏହି ମୂହୁର୍ତ୍ତକୁ ମନେ ପକାଇ ନିଜର ଇନ୍ଷ୍ଟାଗ୍ରାମରେ ଏକ ଫଟୋ ପୋଷ୍ଟ କରିଛନ୍ତି। ଏହାର କ୍ୟାପ୍ଶନରେ ସେ ଲେଖିଛନ୍ତି-୧୩ ବର୍ଷ, ସମୟ କିଭଳି ବିତିଯାଇପାରେ। ତେବେ ଏହି ପୋଷ୍ଟରେ ବ୍ରୋଡ୍ କମେଣ୍ଟ କରିଥିବା ଦେଖାଯାଇଛି। ସେ କହିଛନ୍ତି, ଉକ୍ତ ରାତିରେ ସମୟ ତୁଳନାରେ ବଲ୍ ବେଶୀ ଜୋରରେ ଦୌଡ଼ିଥିଲା। ଏହାର ଉତ୍ତରରେ ଯୁବରାଜ ଲେଖିଛନ୍ତି, ହଁ ବନ୍ଧୁ, ଏଭଳି ଏକ ରାତି, ଯାହାକୁ କେବେ ବି ଭୁଲିପାରିବା ନାହିଁ। ଏହାଛଡ଼ା ପୂର୍ବ କ୍ରିକେଟର ଗୌତମ ଗମ୍ଭୀର ଫିଲ୍ମ ଲାଇନ୍ ଭଳି ପ୍ରତିକ୍ରିୟା ଦେଇ ଲେଖିଛନ୍ତି, ଏହି ରେକର୍ଡ ମୋତେ ଦେଇଦିଅ ଠାକୁର।
ତେବେ ଯୁବରାଜଙ୍କ ଏହି ପୋଷ୍ଟକୁ ଏଯାବତ ୪ ଲକ୍ଷରୁ ଅଧିକ ଲୋକ ପସନ୍ଦ କରିଛନ୍ତି। ସେହିଭଳି ୩୯୦୦ରୁ ଅଧିକ କମେଣ୍ଟ ମିଳିଛି।