ନୂଆଦିଲ୍ଲୀ,୯।୯(ପି.ଟି.): ଭାରତୀୟ କ୍ରିକେଟ୍ ଦଳର ପୂର୍ବତନ ମହାନ ଅଲରାଉଣ୍ଡର ଯୁବରାଜ ସିଂ ଅବସରରୁ ପ୍ରତ୍ୟାବର୍ତ୍ତନ କରିବାକୁ ନିଷ୍ପତ୍ତି ନେଇଛନ୍ତି। ଏ ନେଇ ସେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)କୁ ଚିଠି ଲେଖି ଜଣାଇଛନ୍ତି। ଅବସର ନେବା ପରେ ପଞ୍ଜାବ କ୍ରିକେଟ ଆସୋସିଏଶନ (ପିସିଏ) ତାଙ୍କୁ ପ୍ରତ୍ୟାବର୍ତ୍ତନ କରିବାକୁ ଅନୁରୋଧ କରିଆସୁଥିଲା।
୨୦୧୧ ବିଶ୍ୱକପ୍ରେ ପ୍ଲେୟାର ଅଫ୍ ଦି ଟୁର୍ନାମେଣ୍ଟ ବିବେଚିତ ହୋଇଥିବା ଯୁବରାଜ ଗତ ଜୁନ୍ରେ କ୍ରିକେଟର ସବୁ ଫର୍ମାଟରୁ ଅବସର ଘୋଷଣା କରିଥିଲେ। ପଞ୍ଜାବ କ୍ରିକେଟର ବୃହତ୍ତର ସ୍ବାର୍ଥ ପାଇଁ ପିସିଏ ସମ୍ପାଦକ ପୁନୀତ ବାଲି ତାଙ୍କ ପ୍ରଥମେ ଅବସରରୁ ପ୍ରତ୍ୟାବର୍ତ୍ତନ କରିବାକୁ ପ୍ରସ୍ତାବ ଦେଇଥିଲେ। ଅତିକମ୍ରେ ଟି୨୦ ଫର୍ମାଟରେ ପୁଣି ଥରେ କ୍ରିକେଟ ଖେଳିବାକୁ ଯୁବରାଜ ରାଜି ହୋଇଛନ୍ତି। ପଞ୍ଜାବ ଯୁବ କ୍ରିକେଟର ଶୁବମନ ଗିଲ, ଅଭିଷେକ ଶର୍ମା, ପ୍ରଭସିମରନ ସିଂ ଓ ଅନମୋଲପ୍ରୀତ ସିଂଙ୍କ ସହ ନେଟ୍ସରେ ଗତ କେତେ ମାସ ଅଭ୍ୟାସ କରିବା ପରେ ଯୁବରାଜ କ୍ରିକେଟ ପ୍ରତି ତାଙ୍କ ଭଲ ପାଇବାକୁ ପୁଣି ଥରେ ଆବିଷ୍କାର କରିଛନ୍ତି। ଯୁବି ଏ ନେଇ ବିସିସିଆଇ ସଭାପତି ସୌରଭ ଗାଙ୍ଗୁଲିଙ୍କୁ ଚିଠି ଲେଖିଛନ୍ତି ବୋଲି ବାଲି କହିଛନ୍ତି। ପଞ୍ଜାବ କ୍ରିକେଟକୁ ଅତିକମ୍ରେ ଆଉ ଗୋଟିଏ ବର୍ଷ ସମୟ ଦେବାକୁ ଯୁବିଙ୍କୁ ବାଲି ଅନୁରୋଧ କରିଛନ୍ତି। ପଞ୍ଜାବ କ୍ରିକେଟ ଯୁବିଙ୍କୁ ଏବେ ମଧ୍ୟ ଚାହୁଁଛି। ଏବେ ଗାଙ୍ଗୁଲିଙ୍କଠାରୁ ଜବାବ ମିଳିବ ବୋଲି ବାଲି ଆଶା ପ୍ରକାଶ କରିଛନ୍ତି।