ନୂଆଦିଲ୍ଲୀ,୭।୧୦: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍ ୨୦୨୧) ବର୍ତ୍ତମାନ ଏହାର ଶେଷ ପର୍ଯ୍ୟାୟରେ ପହଞ୍ଚିଛି। ଆଇପିଏଲ୍ ଶେଷ ହେବାର କିଛି ଦିନ ପରେ ପରେ ଅକ୍ଟୋବର ୧୭ରୁ ୟୁଏଇ ଏବଂ ଓମାନରେ ଟି-୨୦ ବିଶ୍ୱକପ୍ ୨୦୨୧ ଆରମ୍ଭ ହେବ। ଏବେ ଲିଗ୍ କ୍ରିକେଟ ଉପଭୋଗ କରୁଥିବା ପ୍ରଶଂସକ ଦେଶକୁ ସମର୍ଥନ କରୁଥିବା ଦେଖିବାକୁ ମିଳିବ। ଟି-୨୦ ବିଶ୍ୱକପ୍ ପାଇଁ ପୂର୍ବରୁ ଭାରତୀୟ କ୍ରିକେଟ ଟିମ୍ର ଘୋଷଣା କରାଯାଇଛି। କିନ୍ତୁ ଆଇପିଏଲ୍ ସମୟରେ କିଛି ଖେଳାଳି ଆହତ ହୋଇପାରନ୍ତି ବୋଲି ଡର ଥିଲା। ଏବେ ତାହା ହିଁ ହୋଇଛି। ଆମେ କଥା ହେଉଛୁ ଆହତ ହୋଇଥିବା ସ୍ପିନର ବରୁଣ ଚକ୍ରବର୍ତ୍ତୀଙ୍କ ବିଷୟରେ। କେଉଁ ଖେଳାଳି ବରୁଣଙ୍କ ସ୍ଥାନ ନେବେ ସେ ନେଇ ଅଧିନାୟକ ବିରାଟ କୋହଲି ସଙ୍କେତ ଦେଇଛନ୍ତି।
ବରୁଣଙ୍କ ଆଣ୍ଠୁଗଣ୍ଠିରେ ସମସ୍ୟା ରହିଛି। ତାଙ୍କୁ ସୁସ୍ଥ ହେବାକୁ ସମୟ ଲାଗିପାରେ। ଏଥିନେଇ ବରୁଣଙ୍କ ବିକଳ୍ପ ଖୋଜିବା ଆରମ୍ଭ ହୋଇଛି। ସେ ସୁସ୍ଥ ହେବା ପରେ ତାଙ୍କୁ ଏନ୍ସିବି ପଠାଯିବ। ପରେ ପରବର୍ତ୍ତୀ ରଣନୀତି ଆପଣାଯିବ ବୋଲି ଜଣାପଡ଼ିଛି।
ବିଶ୍ୱକପ୍ରେ ବରୁଣଙ୍କ ସ୍ଥାନ ନେଇପାରନ୍ତି ୟୁଜବେନ୍ଦ୍ର ଚହଲ। ଚହଲଙ୍କ ଗତ କିଛି ଅନ୍ତର୍ଜାତୀୟ ମ୍ୟାଚ୍କୁ ଧ୍ୟାନରେ ରଖି ଚୟନକର୍ତ୍ତା ତାଙ୍କୁ ବିଶ୍ୱକପ୍ ଦଳରେ ସାମିଲ କରି ନ ଥିଲେ। ହେଲେ ଚଳିତ ଆଇପିଏଲ୍ରେ ପୁଣି ଚମକିଛନ୍ତି ଚହଲ। ସେ ଏଯାବତ ଖେଳାଯାଇଥିବା ୧୬ ମ୍ୟାଚ୍ରୁ ଗୋଟିଏରେ ଉଇକେଟ ନେଇନାହାନ୍ତି। ବାକି ମ୍ୟାଚ୍ରେ ସେ ବହୁତ ପ୍ରଭାବଶାଳୀ ବୋଲିଂ କରି ପୁଣି ଥରେ ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି। ଫଳରେ ବରୁଣଙ୍କ ସ୍ଥାନରେ ଚହଲ ହିଁ ସର୍ବୋତ୍ତମ ବିକଳ୍ପ ବୋଲି କୁହାଯାଉଛି।
ବୁଧବାର ସନରାଇଜର୍ସ ହାଇଦ୍ରାବାଦ ବିପକ୍ଷରେ ଖେଳାଯାଇଥିବା ମ୍ୟାଚ୍ରେ ବାଙ୍ଗାଲୋର ୪ ରନ୍ରେ ପରାଜିତ ହୋଇଥିଲା। ଦଳ ପ୍ରଥମରୁ ପ୍ଲେ ଅଫ୍ରେ ସ୍ଥାନ ପାଇଥିବାରୁ ମ୍ୟାଚ୍ ପରେ କୋହଲି ଦଳର ଖେଳାଳିଙ୍କ ବିଷୟରେ ଚର୍ଚ୍ଚା କରିଥିଲେ। ସେଥିରେ ଚହଲ ରହିଥିଲେ। ଚହଲ ବର୍ତ୍ତମାନ ବହୁତ ଭଲ ବୋଲିଂ କରୁଛନ୍ତି। ତାଙ୍କ ପ୍ରଦର୍ଶନ ଦଳ ପାଇଁ ଭଲ ସଙ୍କେତ ବୋଲି କୋହଲି କହିଥିଲେ। ଏହାକୁ ନେଇ ଚୟନକର୍ତ୍ତାମାନେ ବିଶ୍ୱକପ୍ ପାଇଁ ବରୁଣଙ୍କ ବିକଳ୍ପ ବିଷୟରେ କଥା ହେଲେ ଅଧିନାୟକ କୋହଲି ନିଶ୍ଚିତ ଭାବେ ବିଶ୍ୱସ୍ତ ସ୍ପିନରଙ୍କ ନାମ ନେଇପାରିବେ ବୋଲି ଚର୍ଚ୍ଚା ହେଉଛି।
