ଇସଲମାବାଦ,୧୪।୪: ପାକିସ୍ତାନର ଲେଗ ସ୍ପିନର ଶାଦବ ଖାନ ଆହତ ହୋଇଛନ୍ତି। ଏଭଳି ପରିସ୍ଥିତିରେ ପାକିସ୍ତାନ କ୍ରିକେଟ ବୋର୍ଡ (ପିସିବି) ଜିମ୍ବାୱେ ଗସ୍ତ ପାଇଁ ଟି -୨୦ ଟିମରେ ଲେଗ-ସ୍ପିନର ଜାହିଦ ମହମୁଦଙ୍କୁ ଚୟନ କରିଛି। କିନ୍ତୁ ସେ ଏହି ଗସ୍ତରେ ଯିବାକୁ ମନା କରିଦେଇଥିଲେ। କାରଣ ସେ କେବେ ବିଦେଶରେ ଯାଇ ନାହାନ୍ତି। ଏହି କାରଣରୁ, ସେ ଏକାକୀ ବିମାନରେ ଯାଇପାରିବେ ନାହିଁ ବୋଲି କହିଛନ୍ତି। ଏହା ପରେ ବୋର୍ଡ ତାଙ୍କୁ ବହୁ କଷ୍ଟରେ ରାଜି କରାଇଛି। ସେ ଏପ୍ରିଲ ୨୧ରେ ଦଳ ସହିତ ହରାରେ ଯିବେ। ତେବେ ଜାହିଦ ମନା କରିବା ପରେ ବୋର୍ଡ ସମ୍ମୁଖରେ ଏକ ଅଜବ ପରିସ୍ଥିତି ଉପୁଜିଥିଲା। ଜିମ୍ବାୱେ ଗସ୍ତରେ ପାକିସ୍ତାନ ଦଳକୁ ଦୁଇଟି ଟେଷ୍ଟ ଏବଂ ତିନୋଟି ଟି -୨୦ ମ୍ୟାଚ ଖେଳିବାକୁ ପଡିବ।
ପାକିସ୍ତାନି ଦଳ ଏବେ ଦକ୍ଷିଣ ଆଫ୍ରିକାର ଗସ୍ତରେ ଅଛି। ଦଳ ଏକଦିବସୀୟ ସିରିଜ ୨-୧ରେ ଜିତିଛି। ଟି-୨୦ ସିରିଜ ଏପର୍ଯ୍ୟନ୍ତ ୧-୧ ରହିଛି। ସିରିଜରେ ଦୁଇଟି ମ୍ୟାଚ ବାକି ଅଛି। ତେବେ ଦକ୍ଷିଣ ଆଫ୍ରିକାର ବଡ ଖେଳାଳି କ୍ୱିଣ୍ଟନ ଡି କକ, କାଗିସୋ ରାବାଡା, ଏନ୍ରିଚ୍ ନୋର୍କିଆ, ଡେଭିଡ ମିଲର ଏବଂ ଲୁଙ୍ଗି ଏନଗିଡି ଆଇପିଏଲ ଖେଳିବାକୁ ଭାରତ ଆସିଛନ୍ତି। ଏଭଳି ପରିସ୍ଥିତିରେ ପାକିସ୍ତାନ ଦଳ ଭାରୀ ବୋଲି ବିବେଚନା କରାଯାଏ।
