ସାଉଥାମ୍ପଟନ,୨୨।୮(ପି.ଟି.): ସ୍ଥାନୀୟ ରୋଜ ବାଓଲ ଗ୍ରାଉଣ୍ଡରେ ଚାଲିଥିବା ପାକିସ୍ତାନ ବିପକ୍ଷ ତୃତୀୟ ତଥା ଅନ୍ତିମ କ୍ରିକେଟ ଟେଷ୍ଟ ମ୍ୟାଚ୍ରେ ଜ୍ୟାକ କ୍ରଲିଙ୍କ ଆକର୍ଷଣୀୟ ଦ୍ୱିଶତକ ଓ ଜୋସ୍ ବଟଲରଙ୍କ ଶତକ ସହାୟତା ଘରୋଇ ଇଂଲଣ୍ଡ ବୃହତ୍ ସ୍କୋର ଆଡକୁ ଅଗ୍ରସର ହୋଇଛି।
ଶନିବାର ଦ୍ୱିତୀୟ ଦିବସ ତୃତୀୟ ସେସନରେ ରିପୋର୍ଟ ଲେଖାହେବା ବେଳକୁ ଇଂଲଣ୍ଡ ୧୩୪ ଓଭରରେ ୫ ଉଇକେଟ ହରାଇ ୪୮୮ ରନ ସଂଗ୍ରହ କରିଛି। ଉଇକେଟକିପର ବ୍ୟାଟ୍ସମ୍ୟାନ ଜୋସ ବଟଲର ୧୩୯ ରନର ଶତକୀୟ ଇନିଂସ ଖେଳି ଓ କ୍ରିସ୍ ଓ୍ବକ୍ସ ୧ ରନ କରି ବ୍ୟାଟିଂ ଜାରି ରଖିଥିଲେ। କ୍ରଲି ୨୬୭ ରନର ଦ୍ୱିତୀଶକୀୟ ଇନିଂସ ଖେଳି ଆସାଦ ସାଫିକ୍ଙ୍କ ବଲ୍ରେ ଉଇକେଟକିପର ମହମ୍ମଦ ରିଜଓ୍ବାନଙ୍କ ଦ୍ୱାରା ଷ୍ଟମ୍ପିଂ ହୋଇ ପ୍ୟାଭିଲିୟନ ଫେରିଛନ୍ତି। କ୍ରଲି କ୍ୟାରିୟରର ପ୍ରଥମ ଦ୍ୱିଶତକ ହାସଲ କରିଛନ୍ତି। ସେହିପରି ବଟଲର କ୍ୟାରିୟରର ଦ୍ୱିତୀୟ ଶତକ ଅର୍ଜନ କରିଛନ୍ତି। ୧୨୭ ରନରେ ୪ ଉଇକେଟ ହରାଇ ଇଂଲଣ୍ଡ ସଂଘର୍ଷ କରୁଥିବା ବେଳେ କ୍ରଲି ଓ ବଟଲର ଚତୁର୍ଥ ଉଇକେଟରେ ୩୫୯ ରନ କରି ପାକିସ୍ତାନ ବୋଲରଙ୍କୁ ନିରାଶ କରିବା ସହ ଇଂଲଣ୍ଡ ସ୍ଥିତି ଦୃଢ କରିଥିଲେ। ପ୍ରଥମ ଟେଷ୍ଟ ଜିତି ଇଂଲଣ୍ଡ ୧-୦ରେ ସିରିଜ ଅଗ୍ରଣୀ ହାସଲ କରିଛି। ଦ୍ୱିତୀୟ ଟେଷ୍ଟ ଡ୍ର ରହିଥିଲା। ଅତିକମ୍ରେ ଏହି ମ୍ୟାଚ୍କୁ ଡ୍ର’ ରଖିପାରିଲେ ଘରୋଇ ଦଳ ୧୦ ବର୍ଷ ପରେ ପାକିସ୍ତାନକୁ ପ୍ରଥମଥର ଟେଷ୍ଟ ସିରିଜରେ ପରାସ୍ତ କରିବ। ନିକଟରେ ଇଂଲଣ୍ଡ ଘରୋଇ ପରିବେଶରେ ଓ୍ବେଷ୍ଟଇଣ୍ଡିଜ୍କୁ ଟେଷ୍ଟ ସିରିଜରେ ୨-୧ରେ ପରାସ୍ତ କରିଥିଲା।
