ନୂଆଦିଲ୍ଲୀ/ପଣଜୀ,୨୩।୧୧: ବିବାଦୀୟ ଇସ୍ଲାମୀୟ ବିଦ୍ୱାନ ଜାକିର ନାଏକଙ୍କୁ ଫିଫା ଓ୍ବାଲର୍ଡକପ୍କୁ ବକ୍ତୃତା ଦେବା ପାଇଁ କାତାର ପକ୍ଷରୁ ନିମନ୍ତ୍ରଣ କରାଯିବା ଉପରେ ଭାରତରେ ଉଦ୍ବେଗ ପ୍ରକାଶ ପାଇଛି। ଇଣ୍ଡିଆନ୍ ଫୁଟ୍ବଲ୍ ଆସୋସିଏଶନ୍ ଏବଂ ଖେଳ ଦେଖିବାକୁ ଯାଉଥିବା ଭାରତୀୟମାନେ ବିଶ୍ୱକପ୍କୁ ବର୍ଜନ କରନ୍ତୁ ବୋଲି ଭାଜପା ପକ୍ଷରୁ ଦାବି କରାଯାଇଛି।
ସହ ସମ୍ପୃକ୍ତି ଅଭିଯୋଗ ଆସିବା ପରେ ଭାରତରୁ ପଳାତନ କରିଥିବା ଜାକିର ନାଏକଙ୍କୁ ଭାଷଣ ଦେବା ପାଇଁ ଆୟୋଜକ ରାଷ୍ଟ୍ର କାତାର ଫିଫା ଓ୍ବାଲର୍ଡ କପ୍କୁ ନିମନ୍ତ୍ରଣ କରିଥିଲା। ବିଶ୍ୱ ଆତଙ୍କବାଦର ମୁକାବିଲା ପାଇଁ ଲଢ଼େଇ କରୁଥିବାବେଳେ ତାଙ୍କୁ ଏହି ବିଶ୍ୱମଞ୍ଚରେ ସୁଯୋଗ ଦେବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ଭାଜପା ନେତା ସାଭିଓ ରୋଡ୍ରିଗୁଏସ୍ କହିଛନ୍ତି। ଏହି ପ୍ରସଙ୍ଗ ବିବାଦୀୟ ହେବା ପରେ କେନ୍ଦ୍ର ଗୃହନିର୍ମାଣ ଓ ସହରାଞ୍ଚଳ ବ୍ୟାପାର ମନ୍ତ୍ରୀ ହରଦୀପ ସିଂ ପୁରୀ କହିଛନ୍ତି, ଭାରତ କାତାରକୁ କଡ଼ା ଭାଷାରେ ନିଜ ଆପତ୍ତି ଜଣାଇବ।
ପ୍ରକାଶ ଯେ, ଜାକିର ଭାରତ ଓ ବିଦେଶର ଅନେକ ମୁସଲମାନ ଯୁବକଙ୍କୁ ଆତଙ୍କବାଦ କାର୍ଯ୍ୟକଳାପରେ ସମ୍ପୃକ୍ତ ରହିବା ପାଇଁ ଉସୁକାଉଥିବା ନେଇ ପୂର୍ବରୁ ଜଣାପଡ଼ିଥିଲା। ଗୁଜରାଟ, କର୍ନାଟକ, ଜମ୍ମୁ-କଶ୍ମୀର, ଝାଡ଼ଖଣ୍ଡ, କେରଳ, ମହାରାଷ୍ଟ୍ର ଓ ଓଡ଼ିଶାରେ ତାଙ୍କ ଅନୁଗାମୀ ଥିବା କୁହାଯାଉଛି। ଜାକିର ୨୦୧୬ରେ ଭାରତରୁ ମାଲେସିଆ ପଳାୟନ କରିଥିଲେ। ସେଠାରେ ତାଙ୍କୁ ସ୍ଥାୟୀ ବାସିନ୍ଦା ହେବା ପାଇଁ ତତ୍କାଳୀନ ପ୍ରଧାନମନ୍ତ୍ରୀ ମହାଥିର ମହମ୍ମଦ ଅନୁମତି ଦେଇଥିଲେ। ଜାକିରଙ୍କୁ ପ୍ରତ୍ୟର୍ପଣ କରିବା ପାଇଁ ମାଲେସିଆ ସରକାରଙ୍କୁ ଭାରତ ଅନୁରୋଧ କରିଥିଲା। ଅନ୍ୟ ଧର୍ମଗୁଡ଼ିକ ବିରୋଧରେ ଘୃଣା ମନ୍ତବ୍ୟ ଦେବା ଅଭିଯୋଗରେ ବ୍ରିଟେନ ଓ କାନାଡା ମଧ୍ୟ ଜାକିରଙ୍କ ଉପରେ ନିଷେଧାଦେଶ ଜାରି କରିଛନ୍ତି।