ନୂଆଦିଲ୍ଲୀ, ୧୪।୪ : ଆତଙ୍କବାଦ ବିରୋଧରେ କଠୋର ନିଷ୍ପତ୍ତି ଗ୍ରହଣ କରି କେନ୍ଦ୍ରୀୟ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଆତଙ୍କବାଦୀ ସଂଗଠନ ଉମ୍ର ମୁଜାହିଦ୍ଦିନର ମୁଖ୍ୟ କମାଣ୍ଡର ମୁସ୍ତାକ ଅହମ୍ମଦ ଜରଗର ଓରଫ ଲଟରମଙ୍କୁ ସ୍ବତନ୍ତ୍ର ଆତଙ୍କବାଦ ଆଇନ ଅଧିନିୟମ ଅନୁଯାୟୀ ଆତଙ୍କବାଦୀ ଭାବରେ ଘୋଷଣା କରାଯାଇଛି।
କେନ୍ଦ୍ରୀୟ ସ୍ବରାଷ୍ଟ୍ର ମନ୍ତ୍ରଣାଳୟର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଜରଗର ଜମ୍ମୁ-କଶ୍ମୀରର ଶ୍ରୀନଗର ଅଞ୍ଚଳର ମୂଳ ବାସିନ୍ଦା। ୧୯୮୫ରେ ସେ ଆତଙ୍କବାଦୀ ସଂଗଠନରେ ଯୋଗ ଦେଇଥିଲେ ଏବଂ ଉପତ୍ୟକାରେ ଭାରତ ବିରୁଦ୍ଧରେ ଆତଙ୍କବାଦୀ କାର୍ଯ୍ୟ କରିବା ଆରମ୍ଭ କରିଥିଲେ। ଜରଗର ଭାରତର ସ୍ବରାଷ୍ଟ୍ରମନ୍ତ୍ରୀ ମୁଫତି ମହମ୍ମଦ ସୟିଦଙ୍କ ଝିଅ ରୁବିୟା ସୟିଦଙ୍କୁ ମଧ୍ୟ ୧୨ ଡିସେମ୍ବର ୧୯୮୯ରେ ଅପହରଣ କରି ନେଇଥିଲେ।
ଏହି ଅପହରଣ ପରେ ଆତଙ୍କବାଦୀମାନେ ପୋଲିସ ହେପାଜତରେ ଥିବା ପାଞ୍ଚଜଣ ସାଥୀଙ୍କୁ ମୁକ୍ତ କରିବାକୁ ଦାବି କରିଥିଲେ। ଏହି ଅପହରଣ ମାମଲାକୁ ନେଇ ଅସନ୍ତୋଷ ଦେଖାଦେଇଥିଲା। କିନ୍ତୁ ସରକାର ଆତଙ୍କବାଦୀଙ୍କୁ ମୁକ୍ତ କର ରୁବିୟା ସଇଦଙ୍କୁ ମୁକ୍ତ କରିଥିଲେ।
୧୯୯୧ରେ ଜରଗର ନିଜର ଏକ ଆତଙ୍କବାଦୀ ସଂଗଠନ ଗଠନ କରିଥିଲେ ଯାହାକୁ ସେ ଅଲୱର ମୁଜାହିଦ୍ଦିନ ନାମରେ ନାମିତ କରିଥିଲେ। ଏହା ପରେ ସେ ଜମ୍ମୁ କଶ୍ମୀରରେ ବହୁ ଲୋକ ହତ୍ୟା କରିଥିଲେ। ସେମାନ ମଧ୍ୟରେ କିଛି ଉଚ୍ଚ ପଦାଧିକାରୀ ମଧ୍ୟ ଥିଲେ। ଜାରଗରକୁ ଧରିବା ପାଇଁ ସରକାରଙ୍କ ପକ୍ଷରୁ ଉଦ୍ୟମ ହୋଇଥିଲା। ୧୫ ମେ ୧୯୯୨ରେ ତାଙ୍କୁ ଗିରଫ କରାଯାଇଥିଲା। ତାଙ୍କ ବିରୋଧରେ ୩୬ରୁ ଅଧିକ ହତ୍ୟା ଏବଂ ଅନ୍ୟାନ୍ୟ ଜଘନ୍ୟ ଅପରାଧ ମାମଲା ରୁଜୁ କରାଯାଇଥିଲା।
୧୯୯ରେ ଇଣ୍ଡିଆନ ଏୟାରଲାଇନ୍ସର ବିମାନ ଆଇସି-୮୧୪କୁ ଆତଙ୍କବାଦୀମାନେ ଅପହରଣ କରି ନେଇଥିଲେ। ବିମାନକୁ ପ୍ରଥମେ ପାକିସ୍ତାନରେ ଅବତରଣ କରିବାକୁ ଚେଷ୍ଟା କରାଯାଇଥିଲା କିନ୍ତୁ ପରେ ଏହାକୁ ଦୁବାଇ ଦେଇ ଆଫଗାନିସ୍ତାନର କାନ୍ଦାହାର ବିମାନ ବନ୍ଦରକୁ ନିଆଯାଇଥିଲା। ଅଭିଯୋଗ ହୋଇଥିଲା ଯେ ଆଫଗାନିସ୍ତାନର ତତ୍କାଳୀନ ତାଲିବାନ ସରକାର ଏହି ଆତଙ୍କବାଦୀଙ୍କୁ ସମର୍ଥନ କରିଥିଲେ। ଆତଙ୍କବାଦୀମାନେ ବିମାନ ଏବଂ ଯାତ୍ରୀ ଛାଡିବା ବଦଳରେ ସେମାନଙ୍କ ସାଥୀଙ୍କୁ ମୁକ୍ତ କରିବାକୁ ଦାବି କରିଥିଲେ। ତାଙ୍କ ମଧ୍ୟରେ ମୁସ୍ତାକ ଅହମ୍ମଦ ଜରଗରଙ୍କ ନାମ ମଧ୍ୟ ଅନ୍ତର୍ଭୁକ୍ତ କରାଯାଇଥିଲା।
ଭାରତ ସରକାର ଅନ୍ୟ ଆତଙ୍କବାଦୀଙ୍କ ସହ ଜରଗରକୁ ମଧ୍ୟ ମୁକ୍ତ କରିଥିଲେ। ଏହା ପରେ ସେ ପାକିସ୍ତାନ ଯାଇ ସେଠାରେ ରହି ଭାରତ ବିରୁଦ୍ଧରେ ସମସ୍ତ ଆତଙ୍କବାଦୀ କାର୍ଯ୍ୟକଳାପ ଆରମ୍ଭ କରିଥିଲେ। ୨୦୦୨ ରେ ପାକିସ୍ତାନ ଥରେ ଦାବି କରିଥିଲା ଯେ ଜରଗରଙ୍କୁ ଗିରଫ କରାଯାଇଛି। କିନ୍ତୁ ଗୁପ୍ତଚର ଏଜେନ୍ସି ଅନୁଯାୟୀ, ଜରଗର ପାକିସ୍ତାନରେ ରହି ଭାରତ ବିରୋଧରେ ଆତଙ୍କବାଦୀ କାର୍ଯ୍ୟକଳାପରେ ଜଡିତ ରହିଥିଲେ। ଏହି ସମସ୍ତ ତଥ୍ୟକୁ ଦୃଷ୍ଟିରେ ରଖି କେନ୍ଦ୍ର ଆତଙ୍କବାଦ ବିରୋଧୀ ଆଇନ ଅନୁଯାୟୀ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟ ତାଙ୍କୁ ଆତଙ୍କବାଦୀ ଘୋଷଣା କରିଛି।
ଏହା ପୂର୍ବରୁ ଦାଉଦକ ଇବ୍ରାହିମ, ହାଫିଜ ସଇଦ ଏବଂ ପରେ ହାଫିଜ ସଇଦଙ୍କ ପୁଅ ତାଲହା ସଇଦଙ୍କୁ ଏହି ବର୍ଗର ଆତଙ୍କବାଦୀ ଭାବେ ଘୋଷଣା କରାଯାଇଥିଲା।