କ୍ୱିଭ୍, ୨୯।୬ : ରୁଷିଆ ୟୁକ୍ରେନ ମଧ୍ୟରେ ଯୁଦ୍ଧ ଜାରି ରହିଛି। ଜୁନ ୨୭ରେ, ରୁଷିଆର କ୍ଷେପଣାସ୍ତ୍ରଗୁଡ଼ିକ ୟୁକ୍ରେନର କ୍ରେମେନଚୁକ ସହରର ଏକ ଶପିଂ ସେଣ୍ଟରକୁ ଧ୍ୱଂସ କରିଦେଇଥିଲା। ଯେତେବେଳେ ସେଠାରେ ଶତାଧିକ ଲୋକ ଥିଲେ। ଏହି ଆକ୍ରମଣରେ ୧୮ ଜଣଙ୍କର ମୃତ୍ୟୁ ଘଟିଛି ଏବଂ ବହୁ ଲୋକ ଆହତ ହୋଇଛନ୍ତି। ଏହି ଆକ୍ରମଣ ପରେ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି କହିଛନ୍ତି ଯେ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ ଆତଙ୍କବାଦୀ ହୋଇଯାଇଛନ୍ତି।
ଜାତିସଂଘ ସୁରକ୍ଷା ପରିଷଦକୁ ଏକ ଭିଡିଓ ବାର୍ତ୍ତାରେ ଜେଲେନସ୍କି କହିଛନ୍ତି ଯେ ରୁଷିଆ ବିରୋଧରେ ନ୍ୟାୟିକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ। ଯାହା ଦ୍ୱାରା ଆତଙ୍କବାଦୀ କାର୍ଯ୍ୟକଳାପରୁ ଏହାକୁ ବନ୍ଦ କରାଯାଇପାରିବ। ସେ ଆହୁରି ମଧ୍ୟ କହିଛନ୍ତି ଯେ ରୁଷିଆର ହତ୍ୟାକୁ ରୋକିବା ପାଇଁ ତୁରନ୍ତ ପଦକ୍ଷେପ ନେବାର ଆବଶ୍ୟକତା ରହିଛି।
ଜେଲେନସ୍କି କହିଛନ୍ତି ଯେ ମିଳିତ ଜାତିସଂଘ ୟୁକ୍ରେନକୁ ଏକ ପ୍ରତିନିଧି ଦଳ ପଠାଇବା ଉଚିତ। ଯାହା ଦ୍ୱାରା ଅଧିକାରୀମାନେ ନିଶ୍ଚିତ କରିପାରିବେ ଯେ କ୍ରେମେନଚୁକରେ ହୋଇଥିବା କ୍ଷେପଣାସ୍ତ୍ର ଆକ୍ରମଣ ପ୍ରକୃତରେ ରୁଷିଆର ଆକ୍ରମଣ ଥିଲା। ରୁଷିଆର ସୈନ୍ୟବାହିନୀ ଏହି ମଲକୁ ଟାର୍ଗେଟ କରାଯାଇ ନଥିବା କହିବା ପରେ ଜେଲେନେସ୍କି ଏଭଳି କହିଛନ୍ତି। ପୁଟିନଙ୍କୁ ଆତଙ୍କବାଦୀ ବୋଲି ଉଲ୍ଲେଖ କରି ସେ କହିଛନ୍ତି ଯେ ସପ୍ତାହରେ ସାତ ଦିନ ଆତଙ୍କବାଦୀ ଭାବେ ଆକ୍ରମଣ କରାଯାଉଛି। ପ୍ରତିଦିନ ଏଭଳି ଆତଙ୍କବାଦୀ କାର୍ଯ୍ୟ ଯୋଗୁ ବହୁ ଧନଜୀବନ ହାନୀ ହେଉଛି।
ମିଳିତ ଜାତିସଂଘର ଚାର୍ଟରର ଧାରା ୬ ଅନୁଯାୟୀ ଜେଲେନସ୍କି ଦର୍ଶାଇଛନ୍ତି ଯେ ବିଦ୍ୟମାନ ଚାର୍ଟରରେ ଅନ୍ତର୍ଭୁକ୍ତ ନୀତିକୁ ଉଲ୍ଲଂଘନ କରୁଥିବା ଜଣେ ସଦସ୍ୟଙ୍କୁ ସୁରକ୍ଷା ପରିଷଦର ସୁପାରିଶ କ୍ରମେ ସାଧାରଣ ସଭା ଦ୍ୱାରା ସଂଗଠନରୁ ବହିଷ୍କାର କରାଯାଇପାରେ। ତେବେ ବିଶେଷଜ୍ଞମାନେ କହିଛନ୍ତି ଯେ ଜାତିସଂଘ ସୁରକ୍ଷା ପରିଷଦରୁ ରୁଷିଆକୁ ହଟାଯାଇପାରିବ ନାହିଁ କାରଣ ଏହା ପରିଷଦର ସ୍ଥାୟୀ ସଦସ୍ୟ ଏବଂ ଏହାର ଭିଟୋ କ୍ଷମତା ମଧ୍ୟ ଅଛି।