ନିଶାସେବନ ସ୍ବାସ୍ଥ୍ୟପକ୍ଷେ କ୍ଷତିକାରକ। ସିଗାରେଟଠାରୁ ଆରମ୍ଭ କରି ଅନ୍ୟ ନିଶାଜାତୀୟ ଦ୍ରବ୍ୟକୁ ନିୟମିତ ସେବନ କରିବା ଦ୍ୱାରା ଏହା ଅଭ୍ୟାସରେ ପରିଣତ ହୋଇଥାଏ। ପରବର୍ତ୍ତୀ ସମୟରେ ବିଭିନ୍ନ ପ୍ରକାର ରୋଗର କାରଣ ମଧ୍ୟ ପାଲଟେ। ହେଲେ ଚାଇନାର ଜଣେ ବ୍ୟକ୍ତି ଅଜବ ଯୁକ୍ତି କରିଛନ୍ତି। ଜିନ୍ଜିନ୍ରେ ରହୁଥିବା ଜେଙ୍ଗ କେମିନ ନିକଟରେ ନିଜର ୧୦୦ତମ ଜନ୍ମଦିନ ପାଳନ କରିଥିଲେ। ଏହି ସମୟରେ ସେ ଏକ ସାକ୍ଷାତକାର ଦେଇଥିଲେ। ଏଥିରେ ସେ ନିଜର ସୁସ୍ଥ ଜୀବନ ତଥା ଦୀର୍ଘାୟୁର କାରଣ ନିଶା ସେବନ ବୋଲି କହିଥିଲେ।
ଜେଙ୍ଗ କେବେ ହେଲେ ରାଗନ୍ତି ନାହିଁ। ଏପରିକି ସେ କ’ଣ ଖାଇବେ ସେ ନେଇ ଚିନ୍ତା କରନ୍ତି ନାହିଁ। ୧୫ ବର୍ଷ ବୟସରେ ସେ ଘର ଛାଡ଼ିଥିଲେ। ବାହାରେ କାମ କରିବା ସମୟରେ ସେ ସିଗାରେଟ୍ ଟାଣିବା ଆରମ୍ଭ କରିଥିଲେ। ଧିରେ ଧିରେ ସେ ମଦ ମଧ୍ୟ ପିଇଥିଲେ। ହେଲେ ୩୦ ବର୍ଷ ବୟସରେ ସେ ମଦ ପିଇବା କମ୍ କରିବାକୁ ନିଷ୍ପତ୍ତି ନେଇଥିଲେ।
ଏବେ ଜେଙ୍ଗଙ୍କୁ ୧୦୦ ବର୍ଷ। ତଥାପି ସେ ପ୍ରତ୍ୟେହ ୧ ପ୍ୟାକେଟ୍ ସିଗାରେଟ୍ ଟାଣିଥାନ୍ତି। ବୟସାଧିକ ହୋଇଯିବା ଯୋଗୁ ସେ ଘରେ ରହୁଛନ୍ତି। ହେଲେ ଏଯାବତ ନିଶାସେବନ ଖରାପ କିମ୍ବା ଭଲ ସେ ଜାଣିପାରି ନ ଥିବା ସେ କୁହନ୍ତି। ଏପରିକି ନିଜର ନିରାମୟ ଜୀବନର ରହସ୍ୟ ବୋଲି ସେ କହିଛନ୍ତି, ଯାହାକି ଚର୍ଚ୍ଚାର ବିଷୟ ପାଲଟିଛି।
