ଭୁବନେଶ୍ୱର,୧୪।୩(ବ୍ୟୁରୋ): ରବିବାର ରାଜ୍ୟବାସୀଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କରୋନା ସମ୍ପର୍କରେ ସମ୍ବୋଧିତ କରିଛନ୍ତି। ମୁଖ୍ୟମନ୍ତ୍ରୀ କହିଛନ୍ତି, ଆପଣମାନଙ୍କ ସହଯୋଗରେ କରୋନା ସଂକ୍ରମଣ କମିପାରିଛି। ଆମର ଦୈନିକ ସଂକ୍ରମଣ ୧୦୦ ତଳେ ରହୁଛି। ଆମର କରୋନା ନିୟନ୍ତ୍ରଣ ସ୍ଥିତିକୁ ବିଶ୍ୱ ସ୍ବାସ୍ଥ୍ୟ ସଙ୍ଗଠନ(ଡବ୍ଲ୍ୟୁଏଚ୍ଓ) ବି ପ୍ରଶଂସା କରିଛି। ଲକ୍ଡାଉନ ସମୟର କଷ୍ଟ ଏବେ ବି ସ୍ମୃତି ହୋଇରହିଛି। ତେଣୁ ଆଉ ଲକ୍ଡାଉନକୁ ଫେରିବାକୁ ଇଚ୍ଛା ନାହିଁ। ଆମେ ସତର୍କ ରହିଲେ କରୋନାକୁ ଦୂରେଇ ପାରିବା ବୋଲି ମୁଖ୍ୟମନ୍ତ୍ରୀ କହିଛନ୍ତି। କରୋନା ବିରୋଧରେ ଯୋଦ୍ଧାମାନଙ୍କର ଲଢ଼େଇକୁ ସେ ପ୍ରଶଂସା କରିଛନ୍ତି।
ମହାରାଷ୍ଟ୍ର, ପଞ୍ଜାବ, ଛତିଶଗଡ଼, ମଧ୍ୟପ୍ରଦେଶ ପରି ରାଜ୍ୟରେ କରୋନା ସଂକ୍ରମଣ ବଢ଼ି ଚାଲିଥିବା ବେଳେ ଆମ ରାଜ୍ୟରେ ଏହି ହାର ଖୁବ୍ କମିଛି। ଏଥିପାଇଁ ସେ ସମସ୍ତ ଜନତାଙ୍କୁ ଧନ୍ୟବାଦ ଜଣାଇଛନ୍ତି। ତଥାପି ଏହି ବିପଦ ସମ୍ପୂର୍ଣ୍ଣ ଟଳିନାହିଁ।
ସେ ଆହୁରି ମଧ୍ୟ କହିଛନ୍ତି ଅର୍ଥନୀତି, ସାମାଜିକ ସ୍ଥିତି ଏବଂ ପିଲାଙ୍କ ପାଠପଢ଼ା ପ୍ରଭାବିତ ହୋଇଛି। ଆମେ ଚାହିଁଲେ ଲକ୍ଡାଉନ୍ ଆଉ ଫେରିବ ନାହିଁ। ବାହାରକୁ ଗଲେ ସତର୍କତା ଜରୁରୀ। ଯେପରିକି ମାସ୍କ ପିନ୍ଧିବା, ହାତକୁ ଭଲ ଭାବେ ସାବୁନରେ ଧୋଇବା, ସାମାଜିକ ଦୂରତା ଅବଲମ୍ବନ କରିବାକୁ ମୁଖ୍ୟମନ୍ତ୍ରୀ ରାଜ୍ୟବାସୀଙ୍କୁ ନିବେଦନ କରିଛନ୍ତି। ଅତି ଆବଶ୍ୟକ ନ ପଡ଼ିଲେ ବାହାରକୁ ନ ବାହାରିବା ପାଇଁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତି।
