କେନ୍ଦୁଝର,୧୯।୮(ସ୍ବ.ପ୍ର.): କେନ୍ଦୁଝର ଜିଲା ହରିଚନ୍ଦନପୁର ବ୍ଲକ ବୁଢାଖମଣ ପଞ୍ଚାୟତର ଜୁଆଙ୍ଗ ଜନଜାତି ଲୋକେ ଜଙ୍ଗଲ ଓ ପାହାଡ଼ରେ ଥିବା କାଠ, ପତ୍ର, ଫଳମୂଳ ଆଦି ଉପରେ ନିର୍ଭର କରି ଜୀବିକା ନିର୍ବାହ କରିଆସୁଥିଲେ। କିନ୍ତୁ ଏବେ ପନିପରିବା ଚାଷ କରି ଆତ୍ମନିର୍ଭରଶୀଳ ହେବା ସହ ପରିବାର ଗୁଜୁରାଣ ମେଣ୍ଟାଉଛନ୍ତି। ଫଳରେ ଜଙ୍ଗଲ ଉପରେ ସେମାନଙ୍କୁ ଆଉ ନିର୍ଭରଶୀଳ ହେବାକୁ ପଡୁ ନ ଥିବାବେଳେ ସେମାନେ ଜଙ୍ଗଲ ଓ ପରିବେଶ ନଷ୍ଟ କରୁନାହାନ୍ତି।
ଆଇଟିଡିଏ କେନ୍ଦୁଝର ସହାୟତାରେ ମିଶନ ଜୀବିକା ପ୍ରକଳ୍ପ ମାଧ୍ୟମରେ ସେମାନେ ବୁଢାଖମଣ, ସୋମଗିରି, ନଳପଙ୍ଗା ଓ ସହରଟାଙ୍ଗିରି ଗ୍ରାମର ୨୦୧୮ ମସିହାରୁ ଏହି ସ୍କିମରେ ସୁବିଧା ପାଇଆସୁଛନ୍ତି ା ସୃଷ୍ଟି ସ୍ବେଚ୍ଛାସେବୀ ସଂସ୍ଥା ମାଧ୍ୟମରେ ଖରିଫ ଋତୁରେ ହୋଇଥିବା ଏହି ଚାଷର ତଦାରଖ ହେଉଥିବା ବେଳେ ଏହି ଯୋଜନାରେ ୮୨ ଜୁଆଙ୍ଗ ଚାଷୀ ୨୫ ଏକର ଜମିରେ ଚଳିତବର୍ଷ କଲରା ଚାଷ କରି ବେଶ ଭଲ ରୋଜଗାର କରିପାରିଛନ୍ତି। ସେହିପରି ୪୭ ଜଣ ଜୁଆଙ୍ଗ ମୂଳା, ଗାଜର, ବିଟ ଆଦି ଚାଷ କରିଥିବା ଜଣାପଡିଛି। ସେମାନେ କିଲୋ ୭ ଟଙ୍କାରୁ ୪୪ ଟଙ୍କା ମୂଲ୍ୟରେ ବିକ୍ରି କରିଥିବା କହିଛନ୍ତି। ଏହା ଫଳରେ ସେମାନଙ୍କ ହାରାହାରି ରୋଜଗାର ମାସିକ ୧୫ରୁ ୧୮ ହଜାର ଟଙ୍କା କରିପାରିଛନ୍ତି। ଏପିସି ନୀତିନିୟମକୁ ପାଳନ କରି ଜୁଆଙ୍ଗ ଚାଷୀ ମାନେ ବେପାରୀଙ୍କୁ ପନିପରିବା ବିକ୍ରି କରି ଭଲ ଉପାର୍ଜନ କରୁଛନ୍ତି ା ଆଇଟିଡିଏ ପକ୍ଷରୁ ସେମାନଙ୍କୁ ବିହନ, ସାର ଆଦି ସହାୟତା ପ୍ରଦାନ କରାଯାଇଥିବା ବିଶେଷଜ୍ଞ ଭାନୁମତି ବେହେରା କହିଛନ୍ତି। ପ୍ରଭାତି ଜୁଆଙ୍ଗ, ବନିତା ଜୁଆଙ୍ଗ, ଗୁରୁବାରୀ ଜୁଆଙ୍ଗ ସେମାନଙ୍କ ୨୦ ଡିସିମିଲ ଜମିରୁ ପାଖାପାଖି ୩୦ହଜାର ଟଙ୍କା ରୋଜଗାର କରିଥିବା କହିଛନ୍ତି ା ଲାଭକୁ ଦେଖି ଚଳିତ ବର୍ଷ ୨୦ ଏକର ଜମିରେ ବିନ ଚାଷ କରିବାକୁ ଆଗ୍ରହ ଦେଖାଇଛନ୍ତି।