ବେଙ୍ଗାଲୁରୁ,୧୩ ।୧୨: କରୋନା ଭାଇରସ ଏବେ ଦେଶରୁ ପ୍ରାୟ ଶେଷ ହେବାକୁ ବସିଥିବା ବେଳେ ଏବେ ଜିକା ଭାଇରସ ପୁଣି ସରକାରଙ୍କ ଚିନ୍ତା ବଢାଇବାରେ ଲାଗିଛି । ପୁଣେ ପରେ ଏବେ କର୍ନାଟକରେ ଜିକା ଭାଇରସର ସନ୍ଧାନ ମିଳିଛି । ରାଜ୍ୟରେ ଏହା ଜିକା ଭାଇରସର ପ୍ରଥମ ମାମଲା । ତେବେ ମନ୍ତ୍ରୀ କହିଛନ୍ତି ଏହାକୁ ନେଇ ଭୟଭିତ ହେବାର କୌଣସି କାରଣ ନାହିଁ । କାରଣ ସରକାର ଏହାକୁ ନେଇଆବଶ୍ୟକ ଉପାୟ କରିବା ସହ ଖୁବଶୀଘ୍ର ଏ ସମ୍ପର୍କରେ ଦିଶା-ନିର୍ଦ୍ଦେଶ ଜାରି କରିବେ ।
କେ. ସୁଧାକର କହିଛନ୍ତି ଆମକୁ ପୁଣେ ଲ୍ୟାବରୁ ଯେଉଁ ରିପୋର୍ଟ ମିଳିଛି ସେଥିରେ ଜିକା ଭାଇରସର ପୁଷ୍ଟି କରାଯାଇଛି । ୫ ଡିସେମ୍ବରରେ ଏହି ସାମ୍ପଲ ପଠାଯାଇଥିଲା । ଏହାସହ ଅନ୍ୟ ୨ଟି ସାମ୍ପଲ ପଠାଯାଇଥିଲା ହେଲେ ଏହା ନେଗେଟିଭ ଆସିଛି । ତେବେ ଯାହାର ରିପୋର୍ଟ ପଜିଟିଭ ଆସିଛି ସେ ହେଉଛନ୍ତି ୫ ବର୍ଷର ଜଣେ ଶିଶୁ କନ୍ୟା । ସ୍ୱାସ୍ଥ୍ୟ ବିଭାଗ ପକ୍ଷରୁ ଉକ୍ତ ଶିଶୁଟି ଉପରେ ନଜର ରଖାଯାଇଛି । ସୂଚନାଯୋଗ୍ୟ, କିଛି ମାସ ପୂର୍ବରୁ କେରଳ, ମହାରାଷ୍ଟ୍ର ଓ ଉତ୍ତର ପ୍ରଦେଶରେ ଜିକା ଭାଇରସ ମିଳିଥିଲେ ।
ଏଡିସ ମଶା କାମୁଡିଲେ ଏହି ଜିକା ଭାଇରସ ସଂକ୍ରମିତ ହୋଇଥାଏ । ଏହି ମଶା ଦିନରେ ଅଧିକ ଆକ୍ଟିଭ ଥାଆନ୍ତି । ତେବେ ଜିକା ସଂକ୍ରମଣ ଖୁବଶୀଘ୍ର ରୋଗୀକୁ ଦୁର୍ବଳ କରିଦେଉଥିବାରୁ ତୁରନ୍ତ ହସ୍ପିଟାଲରେ ଭର୍ତ୍ତି ହେବାର ଆବଶ୍ୟକତା ରହିଛି ।
