ପଟ୍ଟାଙ୍ଗୀ,୧୯ା୯(ଡି.ଏନ.ଏ.): କୋରାପୁଟ ଜିଲା ପଟ୍ଟାଙ୍ଗୀ ବ୍ଲକ ତଥା ଆନ୍ଧ୍ର ସୀମାନ୍ତ କୋଟିଆ ପଞ୍ଚାୟତରେ ଆନ୍ଧ୍ର ସରକାରଙ୍କ ପକ୍ଷରୁ ଗତ ଏପ୍ରିଲରେ ହୋଇଥିବା ଜିଲା ପରିଷଦ ଏବଂ ସମିତି ସଭ୍ୟ ନିର୍ବାଚନର ଫଳାଫଳ ରବିବାର ଘୋଷଣା କରାଯାଇଛି। ବିଜୟନଗରମ ଜିଲା ପ୍ରଶାସନ ପକ୍ଷରୁ ସାଲୁର ବ୍ଲକର ସରକାରୀ ଡିଗ୍ରୀ କଲେଜରେ ଭୋଟ ଗଣତି କରି ନିର୍ବାଚିତ ପ୍ରାର୍ଥୀଙ୍କ ନାମ ଘୋଷଣା କରିଛି ଆନ୍ଧ୍ର।
ତଳ ଗଞ୍ଜେଇପଦର ଗ୍ରାମର ମାଝି ଆପାଲାମ ୧୨୪ ଖଣ୍ଡ ଭୋଟ ଏବଂ ଫଗୁଣସିନେରିର କୋନେଟି ଗିନ୍ଦୋ ୩୧୧ ଖଣ୍ଡ ଭୋଟ ପାଇ ସମିତିସଭ୍ୟ ଭାବେ ନିର୍ବାଚିତ ହୋଇଥିବା ଜଣାପଡ଼ିଛି। ସେହିପରି ଜିଲା ପରିଷଦ ସଭ୍ୟ ଭାବେ ଆମ୍ବାଡି ଅନିଲ କୁମାର ୧୬,୩୦୫ ଖଣ୍ଡ ଭୋଟ ପାଇ ନିର୍ବାଚିତ ହୋଇଛନ୍ତି।
ଏହି ନିର୍ବାଚନ ପ୍ରକ୍ରିୟା ଆରମ୍ଭ ହେବା ଦେଖି ସେତେବେଳେ ଭାଜପା, ଟିଡିପି ଓ ଜନସେନା ଦଳ ହାଇକୋର୍ଟର ଦ୍ୱାରସ୍ଥ ହୋଇଥିଲେ। ଏପ୍ରିଲ ୬ରେ ଏକ ୩ଜଣିଆ ଖଣ୍ଡପୀଠ ଏହାର ବିଚାର କରି ନିର୍ବାଚନରେ ରୋକ ଲଗାଇବାକୁ ସ୍ଥଗିତାଦେଶ ଜାରି କରିଥିଲେ। ମାତ୍ର ଆନ୍ଧ୍ର କୋଟିଆରେ ଏପ୍ରିଲ ୮ରେ ଜିଲା ପରିଷଦ ଏବଂ ସମିତି ସଭ୍ୟ ନିର୍ବାଚନ କରିଥିଲା। ହାଇକୋର୍ଟଙ୍କ ସ୍ଥଗିତାଦେଶ ଯୋଗୁ ଫଳାଫଳ ଘୋଷଣା କରିପାରି ନ ଥିଲା। ଆନ୍ଧ୍ର ହାଇକୋର୍ଟ ଗତ ସୋମବାର ଏହି ସ୍ଥଗିତାଦେଶ ଉଠାଇ ଦେବାରୁ ପ୍ରଶାସନ ଭୋଟ ଗଣତି ପ୍ରକ୍ରିୟା ଆରମ୍ଭ କରିଥିଲା। ଭୋଟ ଗଣତି ପରେ ଉପରୋକ୍ତ ବ୍ୟକ୍ତିମାନଙ୍କୁ ନିର୍ବାଚିତ ଘୋଷଣା କରିଛି। ସୂଚନାଯୋଗ୍ୟ, କୋଟିଆ ପଞ୍ଚାୟତର ତଳଗଞ୍ଜେଇପଦର, ଫଗୁଣସିନେରି ଏବଂ ଫାଟୁ ସିନେରି ଆଦି ତିନି ଗ୍ରାମକୁ ଆନ୍ଧ୍ର ତିନୋଟି ପଞ୍ଚାୟତର ମାନ୍ୟତା ଦେଇ ପୂର୍ବରୁ ସରପଞ୍ଚ ନିର୍ବାଚନ କରିଛି।