ନୂଆଦିଲ୍ଲୀ,୨।୧୧ : ଆଡିଲେଡରେ ଜିମ୍ବାୱେ ଏବଂ ନେଦରଲାଣ୍ଡ ମଧ୍ୟରେ ଟି-୨୦ ବିଶ୍ୱକପର ୩୪ ତମ ମ୍ୟାଚରେ ନେଦରଲାଣ୍ଡ ୫ ଓ୍ବିକେଟରେ ଜିତିଛି। ଜିମ୍ବାୱେ ଟସ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇ ୧୯.୨ଓଭରରେ ୧୦ ଓ୍ବିକେଟ ହରାଇ ୧୧୭ ରନ୍ ସଂଗ୍ରହ କରିଥିଲା।
ଧାର୍ଯ୍ୟ ୧୧୮ ଲକ୍ଷ୍ୟର ପିଛା କରି ନେଦରଲାଣ୍ଡ ୧୮ ଓଭରରେ ୫ ଓ୍ବିକେଟ ହରାଇ ୧୨୦ ରନ୍ କରିଥିଲା। ଏହା ସହିତ ଜିମ୍ବାଓ୍ବେ ବିଶ୍ୱକପରୁ ବାହାର ହୋଇଛି।
ମ୍ୟାକ୍ସ ଓଡାଡ ନେଦରଲାଣ୍ଡ ପାଇଁ ୫୨ ରନ ସଂଗ୍ରହ କରିଥିଲେ। ତାଙ୍କ ବ୍ୟତୀତ ଟମ କୁପର୍ ୩୨ ଏବଂ ଭାସ ଡି ଲିଡ ଅପରାଜିତ ୧୨ ସ୍କୋର କରିଥିଲେ। ବ୍ଲେସିଙ୍ଗସ୍ ମୁଜାରବାନୀ ଏବଂ ରିଚାର୍ଡ ଏନଗରୱା ଜିମ୍ବାୱେ ପାଇଁ ଦୁଇଟି ୱିକେଟ ନେଇଥିଲେ।
ଜିମ୍ବାୱେ ଦଳର ଅଭିଜ୍ଞ ବ୍ୟାଟ୍ସମ୍ୟାନ ସିକନ୍ଦର ରଜା ଜିମ୍ବାୱେ ପାଇଁ ସର୍ବାଧିକ ରନ ସଂଗ୍ରହ କରିଥିଲେ। ସେ ୨୪ ବଲରେ ୪୦ ରନ ସଂଗ୍ରହ କରିଥିଲେ। ଏହି ସମୟରେ ସେ ତିନୋଟି ଚୌକା ଓ ତିନି ଛକା ମାରିଥିଲେ। ତାଙ୍କ ବ୍ୟତୀତ ସଚିନ ୱିଲିୟମସନ ୨୩ ଟି ବଲରେ ୨୮ରନ ସଂଗ୍ରହ କରିଥିଲେ।
ନଅ ଜଣ ଜିମ୍ବାୱେ ବ୍ୟାଟ୍ସମ୍ୟାନ ଡବଲ ଫିଗରକୁ ଛୁଇଁ ପାରି ନ ଥିଲେ। ନେଦରଲାଣ୍ଡ ପାଇଁ ପଲ ୱାନ ମେକେରେନ ସର୍ବାଧିକ ତିନୋଟି ୱିକେଟ ନେଇଥିଲେ। ବ୍ରେଣ୍ଡନ ଗ୍ଲୋଭର, ଲୋଗାନ ୱାନ ୱିକ୍ସ ଏବଂ ଭାସ ଡି ଲିଡ ଦୁଇଟି ଲେଖାଏଁ ୱିକେଟ ନେଇଥିଲେ। ଫ୍ରେଡ କ୍ଲାସେନଙ୍କୁ ଗୋଟିଏ ଓ୍ବିକେଟ ମିଳିଥିଲା।
ଏହି ପରାଜୟ ପରେ ଜିମ୍ବାୱେର ଚାରୋଟି ମ୍ୟାଚରୁ ୩ ପଏଣ୍ଟ ରହିଛି। ଦଳ ଗୋଟିଏ ମ୍ୟାଚ ଜିତି ଦୁଇଟିରେ ହାରିଛି। ବର୍ଷା ଯୋଗୁଁ ଗୋଟିଏ ମ୍ୟାଚ ବାତିଲ ହୋଇଥିଲା। ଜିମ୍ବାୱେର ନିଟ ରନ ହାର ହେଉଛି -୦.୩୧୩ । ଏହି ପରାଜୟ ସହିତ ଦଳର ସେମିଫାଇନାଲରେ ପ୍ରବେଶ କରିବାର ଆଶା ଶେଷ ହୋଇଛି। ଜିମ୍ବାୱେର ଏବେ ଭାରତ ବିପକ୍ଷରେ ଖେଳିବାକୁ ଗୋଟିଏ ମ୍ୟାଚ ଅଛି। ଅନ୍ୟପକ୍ଷରେ ନେଦରଲାଣ୍ଡ ଦଳ ପୂର୍ବରୁ ବିଶ୍ୱକପରୁ ବାହାର ହୋଇସାରିଛି। ଦଳ ଚାରିଟି ମ୍ୟାଚରୁ ୨ ପଏଣ୍ଟ ପାଇଛି।