ନୂଆଦିଲ୍ଲୀ,୨୨।୩: ଅନଲାଇନ୍ ଖାଦ୍ୟ ବିତରଣ କମ୍ପାନୀ ‘ଜୋମାଟୋ’ ଗ୍ରାହକଙ୍କ ପାଇଁ ଏକ ବଡ଼ ଘୋଷଣା କରିଛି। ବର୍ତ୍ତମାନ ଏହା ମାତ୍ର ୧୦ ମିନିଟରେ ଲୋକଙ୍କୁ ଖାଦ୍ୟ ଯୋଗାଇବ ବୋଲି କମ୍ପାନୀ କହିଛି। କମ୍ପାନୀର ପ୍ରତିଷ୍ଠାତା ଦୀପିନ୍ଦର ଗୋୟଲ ନିଜେ ଏନେଇ ସୂଚନା ଦେଇଛନ୍ତି। ତେବେ ତାଙ୍କର ଏଭଳି ଘୋଷଣା ପରେ ସୋସିଆଲ ମିଡିଆରେ କମ୍ପାନୀର ନିଷ୍ପତ୍ତିକୁ ପରିହାସ କରାଯାଉଛି। କେବଳ ଶୁଣିବାକୁ ଏହା ଭଲ ଲାଗୁଛି,ବାସ୍ତବରେ ଏହା ସମ୍ଭବ ନୁହେଁ ବୋଲି ଅନେକେ କହୁଥିବା ଦେଖାଯାଉଛି।
କମ୍ପାନୀର ପ୍ରତିଷ୍ଠାତା ଦୀପିନ୍ଦର ଟୁଇଟ୍ କରି କହିଛନ୍ତି , ହାରାହାରି ବିତରଣ ସମୟ ୩୦ ମିନିଟ ବହୁତ ଧିର ହେଉଥିବା ଅନୁଭବ କଲି। ଖୁବ ଶୀଘ୍ର ଏହି ସିଷ୍ଟମ ପରିବର୍ତ୍ତନ ହେବ। ଆମେ ଯଦି ଏହାକୁ ପରିବର୍ତ୍ତନ ନ କରିବା, ଅନ୍ୟ କେହି ଏହି କାମ କରିବେ। ବଜାରରେ ରହିବାକୁ ଚାହୁଁଥିଲେ ଆପଣଙ୍କୁ ନୂଆ କିଛି କରିବାକୁ ହେବ। ତେଣୁ, ଜୋମାଟୋ ଇନଷ୍ଟା ୧୦ ମିନିଟର ଖାଦ୍ୟ ବିତରଣ ସମୟ ସହ ବଜାରକୁ ଆସିଛି।
କମ୍ପାନୀର ଏଭଳି ନିଷ୍ପତ୍ତିରେ ଗ୍ରାହକମାନେ ଖୁସି ଥିଲେ ହେଁ ଏହାକୁ ବିରୋଧ ମଧ୍ୟ କରାଯାଉଛି। ଏପରିକି ଲୋକମାନେ ସୋସିଆଲ ମିଡିଆରେ ଗୋଟିଏ ପରେ ଗୋଟିଏ ମଜାଳିଆ ମେମେ ଶେୟାର କରୁଛନ୍ତି।