ମାଡ୍ରିଡ, ୧୧।୫(ଏପି)-
ଚମତ୍କାର ଫର୍ମ ବଜାୟ ରଖି ଆଲେକଜାଣ୍ଡର ଜେଭ୍ରେଭ ମାଡ୍ରିଡ ଓପନ ଟେନିସ ଟାଇଟଲ ଜିତିଛନ୍ତି। କ୍ୟାରିୟରରେ ଦ୍ୱିତୀୟଥର ପାଇଁ ସେ ମାଡ୍ରିଡ ଟାଇଟଲ ହାସଲ କରିଛନ୍ତି। ଟପ୍ ସିଡ୍ ରାଫାଲ ନାଡାଲଙ୍କୁ କ୍ୱାର୍ଟର ଫାଇନାଲ ଏବଂ ୪ର୍ଥ ର଼୍ୟାଙ୍କ୍ପ୍ରାପ୍ତ ଡୋମିନିକ୍ ଥିମ୍ଙ୍କୁ ସେମିଫାଇନାଲରେ ହରାଇଥିବା ଜେଭ୍ରେଭ ଫାଇନାଲରେ ମାଟିଓ ବେରେଟିନିଙ୍କୁ ୬-୭(୮), ୬-୪, ୬-୩ ସେଟ୍ରେ ପରାସ୍ତ କରି ଚାମ୍ପିୟନ ହୋଇଛନ୍ତି। ଚଳିତ ସିଜନରେ ଏହା ତାଙ୍କର ଦ୍ୱିତୀୟ ଟାଇଟଲ। ୬ଷ୍ଠ ର଼୍ୟାଙ୍କିଙ୍ଗଧାରୀ ଏହି ଜର୍ମାନୀ ଖେଳାଳି ଗତ ମାର୍ଚ୍ଚରେ ମେକ୍ସିକାନ୍ ଓପନ ଜିତିଥିଲେ।
ଜେଭ୍ରେଭ ୨୦୧୮ରେ କ୍ୟାରିୟରର ପ୍ରଥମ ମାଡ୍ରିଡ ଟାଇଟଲ ଜିତିଥିଲେ। ସେତେବେଳେ ସେ ଫାଇନାଲରେ ଥିମ୍ଙ୍କୁ ପରାସ୍ତ କରିଥିଲେ। ଏଥର ଚାମ୍ପିୟନ ହେବାସହ ସେ ୪ର୍ଥ ଥର ପାଇଁ ମାଷ୍ଟର୍ସ ୧୦୦୦ ଟାଇଟଲ ହାସଲ କରିଛନ୍ତି। ତେବେ ଗତ ୩ ବର୍ଷରେ ଏହାଥିଲା ପ୍ରଥମ। ଗତବର୍ଷ ଫ୍ରେଞ୍ଚ୍ ଓପନର ୪ର୍ଥ ରାଉଣ୍ଡରୁ ବିଦାୟ ପରେ ଜେଭ୍ରେଭଙ୍କ ପ୍ରଦର୍ଶନରେ ଆଶାଠାରୁ ଅଧିକ ଉନ୍ନତି ଘଟିଛି। ଫ୍ରେଞ୍ଚ୍ ଓପନରେ ଭଲ କରିବାକୁ ହେଲେ କ୍ଲେ କୋର୍ଟ ସିଜନରେ ଉତ୍ତମ ଖେଳିବାକୁ ହେବ ବୋଲି ୨୪ ବର୍ଷୀୟ ଜେଭ୍ରେଭ କହିଛନ୍ତି। ”ଦୀର୍ଘଦିନ ପରେ ଏକ ମାଷ୍ଟର୍ସ ଟାଇଟଲ ଜିତିଥିବାରୁ ମୁଁ ବହୁତ ଖୁସି। ମୁଁ ଏବେ ଆଗାମୀ କିଛି ସପ୍ତାହ ଉପରେ ଫୋକସ କରିବି“ ବୋଲି ଏହି ଜର୍ମାନୀ ଖେଳାଳି ପ୍ରକାଶ କରିଛନ୍ତି। ୧୦ତମ ର଼୍ୟାଙ୍କ୍ପ୍ରାପ୍ତ ବେରେଟିନି ଗତ ସପ୍ତାହରେ ବ୍ରେଲଗ୍ରେଡ୍ରେ ଟାଇଟଲ ଜିତିଥିଲେ। ତଳିପେଟରେ ଯନ୍ତ୍ରଣା ଯୋଗୁ ସେ ଗତ ଅଷ୍ଟ୍ରେଲିଆନ ଓପନ ଗ୍ରାଣ୍ଡସ୍ଲାମ କ୍ୱାର୍ଟର ଫାଇନାଲ ପରଠାରୁ ଟେନିସରୁ ଦୂରେଇ ରହିଥିଲେ। ମାଣ୍ଟେକାର୍ଲୋ ଟୁର୍ନାମେଣ୍ଟରେ ସେ ପ୍ରତ୍ୟାବର୍ତ୍ତନ ଉଦ୍ୟମ କରିଥିଲେ ହେଁ ପ୍ରଥମ ରାଉଣ୍ଡରୁ ବିଦାୟ ନେଇଥିଲେ। ଏହା ତାଙ୍କ କ୍ୟାରିୟରର ପ୍ରଥମ ମାଷ୍ଟର୍ସ ୧୦୦୦ ଫାଇନାଲ ଥିଲା। ଶ୍ରେଷ୍ଠ ପ୍ରଦର୍ଶନ ଦେଇ ନ ପାରିଲେ ହେଁ ସେ ଖୁସି ଅଛନ୍ତି ବୋଲି ବେରେଟିନି ପ୍ରକାଶ କରିଛନ୍ତି।