ଢେଙ୍କାନାଳ ଅଫିସ, ୮।୬- ଢେଙ୍କାନାଳ ମହିଷାପାଟ ପଡ଼ିଆରେ ପ୍ରସ୍ତାବିତ ନୂତନ ବସଷ୍ଟାଣ୍ଡ ଜମିରେ ରେକର୍ଡ ନ ଥାଇ ଓଏସ୍ଆର୍ଟିସି ପକ୍ଷରୁ ନିର୍ମିତ ପାଚେରିକୁ ଶୁକ୍ରବାର ଜିଲା ପ୍ରଶାସନ ପକ୍ଷରୁ ଉଚ୍ଛେଦ କରାଯାଇଛି। ଜେସିବି ସହାୟତାରେ ସମ୍ପୂର୍ଣ୍ଣ ପାଚେରିକୁ ଭାଙ୍ଗି ଦିଆଯାଇଛି।
ଗମନାଗମନ ବ୍ୟବସ୍ଥାରେ ଉନ୍ନତି ଲାଗି ୨୦୦୦ରୁ ମହିଷାପାଟ ନିକଟରେ ଅତ୍ୟାଧୁନିକ ବସ୍ଷ୍ଟାଣ୍ଡ ନିର୍ମାଣ କରିବାକୁ ଉଦ୍ୟମ ଆରମ୍ଭ ହୋଇଥିଲା। ଏହି କାର୍ଯ୍ୟ ପିପିପି ମୋଡ୍ରେ ହେବ ବୋଲି ତତ୍କାଳୀନ ସମୟରେ ଡ୍ରିଟ୍ ପକ୍ଷରୁ ସୂଚନା ଦିଆଯାଇଥିଲା। ହେଲେ ଠିକାସଂସ୍ଥା ଏବଂ ଡ୍ରିଟ୍ କର୍ତ୍ତୃପକ୍ଷଙ୍କ ମଧ୍ୟରେ ଜାଗାକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହୋଇଥିଲା। ମାମଲା ହାଇକୋର୍ଟ ଯାଏ ଯାଇଥିଲା। ଫଳରେ ବସ୍ଷ୍ଟାଣ୍ଡ ନିର୍ମାଣ କାମ ଅଟକି ରହିଥିଲା। ପରବର୍ତ୍ତୀ ସମୟରେ ଉକ୍ତ ପଡ଼ିଆର ୫ ଏକର ଜାଗା ଓଏସ୍ଆରଟିସି ପକ୍ଷରୁ ବସ୍ଷ୍ଟାଣ୍ଡ ନିର୍ମାଣ ପାଇଁ ଚିହ୍ନଟ ହୋଇଥିଲା। ଜିଲା ପ୍ରଶାସନର ବିନା ଅନୁମତିରେ ରେକର୍ଡଭୁକ୍ତ ହୋଇ ନ ଥିବା ଉକ୍ତ ଜାଗାରେ ଓଏସ୍ଆରଟିସି କର୍ତ୍ତୃପକ୍ଷ ପାଚେରି ତିଆରି କରିଥିଲେ। ଏହା ଜଣାପଡ଼ିବା ପରେ ଜିଲାପାଳଙ୍କ ନିର୍ଦ୍ଦେଶରେ ପାଚେରି ଭଙ୍ଗାଯାଇଛି।
ଏ ସମ୍ପର୍କରେ ତହସିଲଦାର ଉଦୟନାଥ ମହାପାତ୍ର କୁହନ୍ତି, ଓଏସ୍ଆରଟିସି ପକ୍ଷରୁ ବସ୍ଷ୍ଟାଣ୍ଡ ନିର୍ମାଣ ପାଇଁ ଚିହ୍ନଟ ଜାଗାର ବିଧିବଦ୍ଧ ଭାବେ ରେକର୍ଡଭୁକ୍ତ ହୋଇନାହିଁ। କାର୍ଯ୍ୟ ଆରମ୍ଭ ପୂର୍ବରୁ ବିଭାଗ ପକ୍ଷରୁ ଅନୁମତି ପାଇଁ ଆବେଦନ ମଧ୍ୟ କରାଯାଇନାହିଁ। ବେଆଇନ ଭାବେ ନିର୍ମାଣ କରାଯାଇଥିବା ପାଚେରିକୁ ଭାଙ୍ଗିଦିଆଯାଇଛି।
