ଢେଙ୍କାନାଳ ଅଫିସ, ୮।୯ – କଟକ ଇନ୍ଡୋର ଷ୍ଟାଡିୟମସ୍ଥିତ ଶାରଳା ଭବନ ପ୍ରେକ୍ଷାଳୟରେ ଅଗଷ୍ଟ ୨୭ରେ ଆୟୋଜିତ ଅନ୍ତର୍ଜାତୀୟ ଥିଏଟର ଅଲିମ୍ପିଆଡରେ ଢେଙ୍କାନାଳ ସରସ୍ବତୀ ଶିଶୁ ବିଦ୍ୟାମନ୍ଦିରର ୪ର୍ଥ ଶ୍ରେଣୀ ଛାତ୍ର ସାଇପ୍ରସନ୍ନ ବେହେରାଙ୍କୁ ‘ଇଣ୍ଟରନ୍ୟାଶନାଲ ନୃତ୍ୟଗୌରବ’ ସମ୍ମାନରେ ସମ୍ମାନିତ କରାଯାଇଛି।
କଟକସ୍ଥିତ ଉତ୍କଳ ଯୁବ ସାଂସ୍କୃତିକ ସଂଘ ପ୍ରତିଷ୍ଠାତା କାର୍ତ୍ତିକ ଚନ୍ଦ୍ର ରଥଙ୍କ ସ୍ମୃତିରେ ଆୟୋଜିତ ଏହି କାର୍ଯ୍ୟକ୍ରମରେ ରାଜ୍ୟ ସମେତ ଦେଶବିଦେଶର ବହୁ ପ୍ରତିଯୋଗୀ ଅଂଶଗ୍ରହଣ କରିଥିଲେ। ଡ୍ରାମା, ଡ୍ୟାନ୍ସ, ନୃତ୍ୟ ଆଦି ବିଭାଗରେ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ସାଇପ୍ରସନ୍ନ ସମ୍ବଲପୁରୀ, ଛଉ, ଘୁମୁରା, ଧୁଡୁକି, ପାଇକ ନୃତ୍ୟ ପରିବେଷଣ କରି ବିଚାରକଙ୍କ ଦୃଷ୍ଟି ଆକର୍ଷଣ କରିଥିଲେ। ତାଙ୍କ ଦ୍ୱାରା ପରିବେଷିତ ମୋ ଓଡ଼ିଶା ସଙ୍ଗୀତରେ ନୃତ୍ୟ ବେଶ୍ ଆକର୍ଷଣୀୟ ହୋଇଥିଲା। ଏକାଧିକ ବିଭାଗରେ ନିଜ ପ୍ରତିଭାର ପରିଚୟ ଦେଇଥିବାରୁ ସାଇପ୍ରସନ୍ନଙ୍କୁ ଏହି ସମ୍ମାନରେ ସମ୍ମାନିତ କରାଯାଇଛି। ସାଇପ୍ରସନ୍ନ ହେଉଛନ୍ତି ଢେଙ୍କାନାଳ ଷ୍ଟେଶନ ବଜାର ଅଞ୍ଚଳରେ ରହୁଥିବା ସଞ୍ଜୟ ବେହେରା ଏବଂ ପୁଷ୍ପଲତା ବେହେରାଙ୍କ ବଡ଼ ପୁଅ। ସେ ସ୍ଥାନୀୟ ଶିବାୟା ଡ୍ୟାନ୍ସ ଏକାଡେମୀରେ ନୃତ୍ୟ ଶିକ୍ଷା କରୁଛନ୍ତି। ଏଥିସହ ଅଲଟରନେଟିଭ୍ ରିଦିମ ଥିଏଟରରେ ଅଭିନୟ ତାଲିମ ନେଉଛନ୍ତି। ମଞ୍ଚ ନାଟକ ବ୍ୟାଚଲର, କୁନ୍ଦୁଲି ରାଇଜର ଝି, ବାଣା ପରାଜୟ, ଲୋଇବି ନାପାମା ନାଟକରେ ତାଙ୍କ ଅଭିନୟ ମଧ୍ୟ ଉଚ୍ଚ ପ୍ରଶଂସିତ ହୋଇଛି।
