ଅହମ୍ମଦାବାଦ୍,୧୭।୭: ଗୁଜରାଟର ବନାସକାଣ୍ଠା ଅନ୍ତର୍ଗତ ଦନ୍ତିଓ୍ବାଡ଼ାରେ ଅବିବାହିତା କନ୍ୟା ମୋବାଇଲ୍ ଫୋନ୍ ରଖିପାରିବେନି ବୋଲି ନିୟମ ପ୍ରଚଳନ ହୋଇଛି। ଏହାକୁ ସ୍ଥାନୀୟ ଠାକୁର ସମ୍ପ୍ରଦାୟ ପକ୍ଷରୁ ଜାରି କରାଯାଇଛି। ସ୍ଥାନୀୟ ପଞ୍ଚାୟତ ପକ୍ଷରୁ ଏହି ନିୟମ ପ୍ରଣୟନ କରାଯାଇଥିବା କୁହାଯାଉଛି। ଜଲୋଲ ଗାଁରେ ହୋଇଥିବା ପଞ୍ଚାୟତ ବୈଠକରେ ଏହି ନିଷ୍ପତ୍ତି ଗ୍ରହଣ କରାଯାଇଛି। ଏହାର ଉଲ୍ଲଂଘନ କଲେ ସମ୍ପୃକ୍ତ ଅବିବାହିତା କନ୍ୟା ପିତା ଅଥବା ପରିବାର ସଦସ୍ୟଙ୍କୁ ଏଥିପାଇଁ ଦେଢ଼ଲକ୍ଷ ଟଙ୍କାର ଜରିମାନା ଦେବାକୁ ପଡ଼ିବ ବୋଲି ପଞ୍ଚାୟତ ପକ୍ଷରୁ କୁହାଯାଇଛି। ତେବେ ପଞ୍ଚାୟତ ସଦସ୍ୟ ଜୟନ୍ତୀ ଭାଇ ଠାକୁର କହିଛନ୍ତି ଯେ, ବିବାହରେ ଅଯଥା ଖର୍ଚ୍ଚ ଏବଂ ଡିଜେ ବ୍ୟବହାର ଉପରେ ଆଲୋଚନା ବୈଠକରେ ହୋଇଥିଲା। ସେହିପରି ଅବିବାହିତା କନ୍ୟା ମୋବାଇଲ୍ ଫୋନ୍ ରଖିବା ଉପରେ ଚର୍ଚ୍ଚା ହୋଇଥିଲା। ଏନେଇ ଖୁବ୍ ଶୀଘ୍ର ଆଇନ ପ୍ରଣୟନ କରାଯିବ ବୋଲି ସେ ସୂଚନା ଦେଇଛନ୍ତି।
