ଭୁବନେଶ୍ୱର,୨୧।୫(ବ୍ୟୁରୋ): ଜଣେ ୩୬ ବର୍ଷୀୟ କନଷ୍ଟେବଳଙ୍କ କୋଭିଡ୍ ଟେଷ୍ଟ ରିପୋର୍ଟ ପଜିଟିଭ୍ ଆସିବା ପରେ ତତ୍ପର ହୋଇଉଠିଛି କମିଶନରେଟ ପୋଲିସ। ଏବେ କୌଣସି ଅଭିଯୁକ୍ତଙ୍କୁ ଗିରଫ କରିବା ବେଳେ ଏସ୍ଓପି (ସ୍ପେଶଲ ଅପରେଶନ ପ୍ରୋସିଜିଓର) ପାଳନ କରିବା ପାଇଁ ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ ନିର୍ଦ୍ଦେଶ ଦେଇଛନ୍ତି।
ଏଭଳି ପରିସ୍ଥିତିର ମୁକାବିଲା କରିବା ପାଇଁ ଡାକ୍ତରୀ ଅଭିଜ୍ଞତା ଥିବା ବରିଷ୍ଠ ପୋଲିସ ଅଧିକାରୀଙ୍କୁ ନେଇ ୪ଟି ଟିମ୍ ଗଠନ କରିଛି କମିଶନରେଟ ପୋଲିସ। ଏହାର ଏକାଧିକ ଜୋନ୍ରେ କାର୍ଯ୍ୟରତ କର୍ମଚାରୀ, ରିଜର୍ଭ ପୋଲିସ କର୍ମଚାରୀ ଓ ଡିସିପି ଅଫିସରେ କାର୍ଯ୍ୟରତ କର୍ମଚାରୀଙ୍କ ସ୍ବାସ୍ଥ୍ୟ ପରୀକ୍ଷା ଓ ବଡି ସ୍କ୍ରିନିଂ କରାଇଛି ଏହି ଟିମ୍। ଯେଉଁମାନଙ୍କର କିଛି ଲକ୍ଷଣ ଦେଖାଯାଉଛି, ସେମାନଙ୍କର ସ୍ବାବ୍ ପରୀକ୍ଷା ପାଇଁ ପଠାଯାଉଛି। ଏଯାବତ୍ କଟକ, ଭୁବନେଶ୍ୱରରେ କାର୍ଯ୍ୟରତ ୬ ହଜାର ପୋଲିସ କର୍ମଚାରୀଙ୍କ ସ୍ବାବ୍ ପରୀକ୍ଷଣ କରାଯାଇଛି। ସମସ୍ତଙ୍କ ରିପୋର୍ଟ ନେଗେଟିଭ୍ ଆସିଥିବା ବେଳେ ମାତ୍ର ଜଣଙ୍କର ପଜିଟିଭ୍ ଆସିଥିବା କମିଶନରେଟ ପୋଲିସର ସୂଚନା ଓ ଲୋକ ସମ୍ପର୍କ ବିଭାଗ ପ୍ରକାଶ କରିଛି। ଯେଉଁମାନଙ୍କର ବୟସ ୫୦ ବର୍ଷରୁ ଅଧିକ ଓ ଯଦି ସେମାନେ ମଧୁମେହ କିମ୍ବା ଅନ୍ୟ କିଛି ଦୀର୍ଘକାଳୀନ ରୋଗରେ ପୀଡ଼ିତ, ତେବେ ସେମାନଙ୍କୁ ଘରେ ରହି କାମ କରିବାକୁ ପୋଲିସ କମିଶନର ନିର୍ଦ୍ଦେଶ ଦେଇଛନ୍ତି। ସେମାନେ ଘରେ ରହି କେସ୍ ଡାଏରୀ ଲେଖିବା ଓ ଅନ୍ୟ କାମ କରୁଛନ୍ତି।
