ସମ୍ବଲପୁର,(ବ୍ୟୁରୋ)-କରୋନା ଭୂତାଣୁ ସଂକ୍ରମଣ ରୋକିବା ପାଇଁ ଦେଶକୁ ଲକଡାଉନ କରି କେତେକ କଟକଣା ଘୋଷଣା କରାଯାଇଛି । ହେଲେ କେତେକ ଏହାକୁ ମାନୁ ନାହାନ୍ତି। ଏଣୁ ଜିଲାରେ ଅମାନିଆଙ୍କୁ ସାବାଡ କରିବା ପାଇଁ ପୋଲିସ ଓ ଜିଲା ପ୍ରଶାସନ କଠୋର ଅଭିମୁଖ୍ୟ ଗ୍ରହଣ କରିଛି । ପ୍ରଶାସନ ପକ୍ଷରୁ କେବଳ ସକାଳ ୭ରୁ ମଧ୍ୟାହ୍ନ ୧୨ ପର୍ଯ୍ୟନ୍ତ ସମସ୍ତ ଦୋକାନ ବଜାର ଖୋଲିବାକୁ ନିର୍ଦ୍ଦେଶ ଦିଆଯାଇଛି। ଏହି ସମୟ ପରେ ଦୋକାନ ଖୋଲା ଥିଲେ ତାହା ସିଲ୍ କରି ଦିଆଯିବ ବୋଲି କୁହାଯାଇଛି। ଅନ୍ୟପକ୍ଷେ ସମ୍ବଲପୁର ସହରର ଧନୁପାଲି ଛକ, ଜେଲଖାନା ଛକ, ଜିଲାସ୍କୁଲ ଛକ, ଲକ୍ଷ୍ମୀଟକିଜ ଛକ, ଅଇଁଠାପାଲଇ ଛକ, ଦୁର୍ଗାପାଲି, କଚେରୀ ଛକ, ସିନ୍ଦୂରପଙ୍କ ଛକରେ ପୋଲିସ ଗାଡଇମୋଟର କଡାକଡି ଯାଞ୍ଚ କରିଛି। ସମ୍ବଲପୁର ଏସ୍ପି କନୱର ବିଶାଳ ସିଂ ବିଭିନ୍ନ ଅଞ୍ଚଳ ବୁଲି ଦେଖୁଛନ୍ତି। ଜିଲାପାଳ ଶୁଭମ୍ ସକ୍ସେନା ଏକ ଭିଡିଓରେ ଜିଲାବାସୀଙ୍କୁ ଲକଡାଉନର କଟକଣା ପାଳନ କରିବାକୁ ଅନୁରୋଧ କରି ସ୍ବାସ୍ଥ୍ୟ ବିଭାଗ, ପୋଲିସ, ଆଶା ଓ ଅଙ୍ଗନଓ୍ବାଡି କର୍ମୀଙ୍କୁ କୃତଜ୍ଞତା ଜଣାଇଛନ୍ତି।
