ଅକ୍ଟୋବର ୧୦ ଅର୍ଥାତ୍ ଆଜି ରେଖାଙ୍କ ଜନ୍ମଦିନ। ଆଜିର ଏହି ଖାସ୍ ଦିନରେ କିଛି କଥା ହୁଏତ ପ୍ରଶଂସକମାନେ ଜାଣି ନ ଥିବେ। ତେବେ ଆସନ୍ତୁ ଜାଣିବା ରେଖାଙ୍କ ସମ୍ପର୍କରେ…
ରେଖା ବ୍ୟକ୍ତିଗତ ଜୀବନକୁ ନେଇ ବେଶ୍ ସଚେତନ। ମିଡିଆ ସାମ୍ନାରେ କୌଣସି କଥା କହିବାକୁ ସେ ଆଦୌ ପସନ୍ଦ କରନ୍ତି ନାହିଁ। ଯେତେବେଳେ ବି କଥା ହୁଅନ୍ତି ମାପିଚୁପି କଥା ହୁଅନ୍ତି। ଏକ ସାକ୍ଷାତକାରରେ ରେଖାଙ୍କୁ ଯେତେବେଳେ ପଚରାଯାଇଥିଲା ଆପଣଙ୍କ ସହକଳାକାର କିଏ? ସେ ସଙ୍ଗେ ସଙ୍ଗେ ଉତ୍ତର ଦେଇଥିଲେ ରଣଧୀର କପୁର। ପ୍ରଶଂସକମାନେ ଚାହିଁ ବସିଥିଲେ ରେଖା ନିଶ୍ଚିତ ଅମିତାଭଙ୍କ ନାଁ ନେବେ ମାତ୍ର ରେଖା ରଣଧୀରଙ୍କ ନାଁ ନେଇଥିଲେ। ତାଙ୍କର ଏହି କଥାରେ ସମସ୍ତେ ଚକିତ ହୋଇପଡ଼ିଥିଲେ।
କାରଣ ୭୦ ଦଶକରେ ଅମିତାଭଙ୍କ ସହିତ ରେଖା ଅଧିକାଂଶ ଫିଲ୍ମରେ ଅଭିନୟ କରିସାରିଥିଲେ। ଏହି ଯୋଡ଼ି ସେତେବେଳେ ଖୁବ୍ ହିଟ୍ ମଧ୍ୟ ହୋଇଥିଲେ। ଅନ୍ ସ୍କ୍ରିନ୍ ବ୍ୟତୀତ ଅପ୍ ସ୍କ୍ରିନ୍ରେ ବି ଦୁହିଁଙ୍କୁ ନେଇ ଖୁବ୍ ଚର୍ଚ୍ଚା ହେଉଥିଲା। ତାଙ୍କୁ ବିବାହ କରିବେ ବୋଲି ବଲିଉଡ୍ରେ ସେତେବେଳେ ଚର୍ଚ୍ଚା ଜୋର ଧରିଥିଲା। କିନ୍ତୁ କୌଣସି କାରଣ ବଶତଃ ଅମିତାଭ ରେଖାଙ୍କୁ ଛାଡ଼ି ଜୟାଙ୍କ ହାତ ଧରିଥିଲେ। ରେଖା ମଧ୍ୟ ବିଜନେସ୍ମ୍ୟାନ୍ ମୁକେଶ ଅଗ୍ରଓ୍ବାଲ୍ଙ୍କୁ ୧୯୯୦ରେ ବିବାହ କରିଥିଲେ। ବିବାହର ଗୋଟିଏ ବର୍ଷ ପରେ ମୁକେଶ ଆତ୍ମହତ୍ୟା କରିଥିଲେ। ଏହା ପରେ ଅଭିନେତା ବିନୋଦ ମେହେରାଙ୍କ ସହ ତାଙ୍କ ନାଁ ପୁଣି ଯୋଡ଼ି ହୋଇଥିଲା। ଏପରିକି ରେଖା ବିନୋଦଙ୍କୁ ବିବାହ କରିଥିବା ଶୁଣିବାକୁ ମିଳିଥିଲା। କିନ୍ତୁ ଏହି କଥାକୁ ରେଖା ଅସ୍ବୀକାର କରିଥିଲେ। ବିନୋଦ ତାଙ୍କର ଜଣେ ଶୁଭାକାଂକ୍ଷୀ ବୋଲି ସେ କହିଥିଲେ।
