ବେଙ୍ଗାଲୁରୁ, ୧ା୧୦(ପି.ଟି.): ଅଯୋଗ୍ୟ ଘୋଷିତ କଂଗ୍ରେସ ଓ ଜେଡିଏସ୍ ବିଧାୟକଙ୍କୁ ମନାଇବା ଲାଗି ଭାଜପା ପକ୍ଷରୁ ଉଦ୍ୟମ ଆରମ୍ଭ ହୋଇଛି। ଯଦି ସମସ୍ତ ୧୫ ଅଯୋଗ୍ୟ ଘୋଷିତ ବିଧାୟକ ଚାହିଁବେ ଦଳରେ ସାମିଲ ହୋଇ ଆଗାମୀ ଉପନିର୍ବାଚନ ଲାଗି ଭାଜପାରୁ ପ୍ରାର୍ଥୀ ହୋଇପାରିବେ ବୋଲି କର୍ନାଟକ ମୁଖ୍ୟମନ୍ତ୍ରୀ ବି.ଏସ୍. ୟୋଦୁରାପ୍ପା ସୋମବାର ପ୍ରକାଶ କରିଛନ୍ତି। ଭାଜପା ଅଧ୍ୟକ୍ଷ ଅମିତ ଶାହ ଏହା ଚାହୁଁଥିବା ସେ ମତ ଦେଇଛନ୍ତି। ଗତ ଜୁଲାଇ ମାସରେ କଂଗ୍ରେସ-ଜେଡିଏସ୍ ମେଣ୍ଟ ସରକାର ବିରୋଧରେ ଏମାନେ ସ୍ବର ଉତ୍ତୋଳନ କରିଥିଲେ। ସରକାର ପତ୍ତନ ପରେ ଭାଜପା କ୍ଷମତାସୀନ ହେବା ଲାଗି ରାସ୍ତା ଫିଟିଥିଲା। ସେମାନଙ୍କ ନିର୍ବାଚନ ମଣ୍ଡଳୀରେ ଉପନିର୍ବାଚନ ହେବାକୁ ଯାଉଥିବାବେଳେ ଭାଜପା ପକ୍ଷରୁ ଚତୁରତାର ସହ ଗୋଟିଚାଳନା କରାଯାଇଛି। ଦଳରେ ଏକାଧିକ ପରାଜିତ ଓ ନବାଗତ ପ୍ରାର୍ଥୀଙ୍କୁ ଅଣଦେଖା କରି ଅଯୋଗ୍ୟ ଘୋଷିତ ବିଧାୟକଙ୍କୁ ସୁଯୋଗ ଦିଆଯିବ ବୋଲି ମୁଖ୍ୟମନ୍ତ୍ରୀ କହିବା ପରେ ଅସନ୍ତୋଷ ବଢିବାରେ ଲାଗିଛି। ତେବେ ଅସନ୍ତୁଷ୍ଟଙ୍କୁ ବିଭିନ୍ନ କର୍ପୋରେଶନ ଓ ବୋର୍ଡରେ ଅବସ୍ଥାପିତ କରାଯାଇ ପାରିବ ବୋଲି ୟୁଦୁରାପ୍ପା କହିଛନ୍ତି। ଶିମୋଗା ଜିଲା ଶିକାରୀପୁର ବାସଭବନରେ ମୁଖ୍ୟମନ୍ତ୍ରୀ କହିଛନ୍ତି, କିଛି ଦ୍ୱନ୍ଦ୍ୱ ନାହିଁ। ସେମାନେ ଚାହିଁଲେ ସମସ୍ତ ୧୫ଙ୍କୁ ଦଳ ଟିକେଟ ଦେବାକୁ ପ୍ରସ୍ତୁତ। ସେମାନଙ୍କ ବିଜୟ ଲାଗି ଭାଜପା ପଦକ୍ଷେପ ନେବ। ଦଳ ପ୍ରତି ସେମାନେ ଆସ୍ଥା ରଖିବା ଦରକାର।
