ଚେନ୍ନାଇ, ୨୯ା୪ (ପି.ଟି.)-ପୂର୍ବତନ କର୍ନାଟକ ବ୍ୟାଟ୍ସମ୍ୟାନ ଜେ. ଅରୁଣ କୁମାର ମଙ୍ଗଳବାର ଯୁକ୍ତରାଷ୍ଟ୍ର ଆମେରିକା (ୟୁଏସ୍ଏ) କ୍ରିକେଟ ଟିମ୍ର କୋଚ୍ ଭାବେ ନିଯୁକ୍ତି ପାଇଛନ୍ତି। ଅରୁଣ କୁମାର କ୍ରିକେଟ ମହଲରେ ଜଣାଶୁଣା। ସେ ବହୁ ବର୍ଷ ଧରି କର୍ନାଟକ ଦଳ ସହିତ କାର୍ଯ୍ୟ କରିଛନ୍ତି। ଆଇପିଏଲ୍ ପ୍ରାଞ୍ଚାଇଜ୍ କିଙ୍ଗ୍ସ ଇଲେଭେନ ପଞ୍ଜାବର ବ୍ୟାଟିଂ କୋଚ୍ ମଧ୍ୟ ଥିଲେ। ୟୁଏସଏ କ୍ରିକେଟର ମୁଖ୍ୟ କାର୍ଯ୍ୟନିର୍ବାହୀ ଇଏନ୍ ହିଗିନ୍ସ କହିଛନ୍ତି, କୋଚ୍ ପଦବୀ ପାଇଁ ଯେତେଜଣ ପ୍ରାର୍ଥୀ ଥିଲେ ସେମାନଙ୍କ ମଧ୍ୟରୁ ପୂର୍ବତନ ରଣ୍ଜୀ ଓ ଆଇପିଏଲ୍ ଖେଳାଳି ଏବଂ କୋଚ୍ ଅରୁଣ କୁମାରଙ୍କୁ ଆମେ ପସନ୍ଦ କରିଥିଲୁ। ସିଇଓ ପୁଣି କହିଛନ୍ତି ଯେ, ଅରୁଣ କୁମାର ଇତିମଧ୍ୟରେ ହ୍ୟୁଷ୍ଟନଠାରେ ଅନୁଷ୍ଠିତ ଏକ ଟ୍ୟାଲେଣ୍ଟ କ୍ୟାମ୍ପକୁ ଆସି ସପୋର୍ଟ ଷ୍ଟାଫ୍, ସିଲେକ୍ଟର୍ସ ଏବଂ ଖେଳାଳିମାନଙ୍କ ସହିତ ସାକ୍ଷାତ କରି ଯାଇଛନ୍ତି। ସେ ଆମ ସହିତ ଆଲୋଚନା ମଧ୍ୟ ଜାରି ରଖିଛନ୍ତି। ଅରୁଣ କୁମାରଙ୍କ ପାଇଁ ଓ୍ବାର୍କିଂ ଭିଜା ଯୋଗା ହୋଇଯିବା ପରେ ସେ ଆମେରିକାରେ ରହି ଖେଳାଳି ମାନଙ୍କୁ ତାଲିମ ଦେବ। ଅରୁଣ କୁମାର ପୁଡୁଚେରୀ ଟିମ୍ର ଦାୟିତ୍ୱରେ ମଧ୍ୟ ଥିଲେ। ମାତ୍ର ଆସୋସିଏଶନର ଅଫିସିଆଲଙ୍କ ସହିତ ତାଙ୍କର ମତଭେଦ ହେବାରୁ ସେ ଫେବୃୟାରୀରେ ପଦତ୍ୟାଗ କରିଥିଲେ। କୋଭିଡ୍-୧୯ ମହାମାରୀ ଯୋଗୁ ଅରୁଣ କୁମାର ବର୍ତ୍ତମାନ ଆମେରିକା ଗସ୍ତ କରିପାରୁ ନାହାନ୍ତି।
