ଅନୁଗୋଳ ଅଫିସ୍, ୨୯।୨ – ୧୩ ବର୍ଷ ତଳେ ଅନୁଗୋଳ ବସ୍ଷ୍ଟାଣ୍ଡରେ ଜଣେ ମହିଳାଙ୍କୁ କରାଯାଇଥିବା ଅସଦାଚରଣ ମାମଲାର ବିଚାର କରି ଅନୁଗୋଳ ପ୍ରଥମ ଶ୍ରେଣୀ ବିଚାର ବିଭାଗୀୟ ଅଦାଲତ ବିଚାରପତି ତାରିଣୀ ପ୍ରସାଦ ସାହୁ ଅଭିଯୁକ୍ତ ବିଜୟ କୁମାର ପ୍ରଧାନଙ୍କୁ ଦୋଷୀ ସାବ୍ୟସ୍ତ କରିବା ସହ ୧୩ ମାସ କାରାଦଣ୍ଡରେ ଦଣ୍ଡିତ କରିଛନ୍ତି। ଗତ ୨୬ ତାରିଖରେ ଏହି ରାୟ ପ୍ରକାଶ ପାଇଥିବା ଅତିରିକ୍ତ ପିପି ରୋହିତ କୁମାର ବେହେରା ସୂଚନା ଦେଇଛନ୍ତି।
ମାମଲାରୁ ପ୍ରକାଶ ଯେ, ସମ୍ପୃକ୍ତା ମହିଳାଙ୍କ ଘର ନବରଙ୍ଗପୁରରେ ହୋଇଥିବାବେଳେ ସେ କଣିହଁ। ଅଞ୍ଚଳରେ ବିବାହ କରିଥିଲେ। କୌଣସି କାରଣରୁ ସ୍ବାମୀଙ୍କ ସହ ମନାନ୍ତର ପରେ ସେ ବାପଘରକୁ ଚାଲିଯାଇଥିଲେ। ଏପରି କି ନବରଙ୍ଗପୁର ଥାନାରେ ସେ ଶାଶୁଘର ବିରୋଧରେ ନିର୍ଯାତନା ଅଭିଯୋଗ ମଧ୍ୟ କରିଥିଲେ। ଏ ନେଇ ନବରଙ୍ଗପୁର ପୋଲିସ ନଂ. ୫୬/୦୭ରେ ଏକ ମାମଲା ରୁଜୁ କରିଥିଲା। ତେବେ ୨୦୦୭ ମସିହାରେ ଅଭିଯୁକ୍ତ ବିଜୟ କୌଣସି ପ୍ରକାରେ ସମ୍ପୃକ୍ତା ମହିଳାଙ୍କ ମୋବାଇଲ ନଂ ଯୋଗାଡ଼ କରି ତାଙ୍କୁ ପ୍ରଥମେ ଧମକଚକମ ଦେଉଥିଲେ। ଏହାପରେ ଏକ ସଂସ୍ଥାରେ ଥଇଥାନ କରିଦେବାକୁ କହି ତାଙ୍କୁ ଅନୁଗୋଳ ଡାକିଥିଲେ। ମହିଳା ଜଣକ ତାଙ୍କ ମା’ଙ୍କ ସହ ଅନୁଗୋଳ ବସ୍ଷ୍ଟାଣ୍ଡରେ ପହଞ୍ଚିବା ପରେ ବିଜୟ ତାଙ୍କୁ ଲଜ୍କୁ ନେବାକୁ ଟଣାଓଟରା କରିଥିଲେ। ମହିଳାଙ୍କ ମା’ ପାଟି କରିବାରୁ ସେଠାରେ ସାଦା ପୋଷାକରେ ଥିବା ଜଣେ ପୋଲିସ କର୍ମଚାରୀ ମହିଳାକୁ ଉଦ୍ଧାର କରିଥିଲେ। ଏହାପରେ ମହିଳାଙ୍କ ଅଭିଯୋଗକ୍ରମେ ଅନୁଗୋଳ ପୋଲିସ ନଂ. ୭୯୬/୦୭ରେ ଏକ ମାମଲା ରୁଜୁ କରି ଅଭିଯୁକ୍ତ ବିଜୟଙ୍କୁ ଗିରଫ କରିଥିଲା। ମୋଟ୍ ୬ ଜଣଙ୍କ ସାକ୍ଷ୍ୟ ପ୍ରମାଣଙ୍କୁ ଭିତ୍ତିକରି ଅଦାତଲ ଦୀର୍ଘ ୧୩ ବର୍ଷ ପରେ ଏହି ରାୟ ଶୁଣାଇଛନ୍ତି। ଏହି ମାମଲାକୁ ସରକାରଙ୍କ ପକ୍ଷରୁ ଅତିରିକ୍ତ ପିପି ରୋହିତ କୁମାର ବେହେରା, ସୁନୀଲ କୁମାର ସାହୁ ପରିଚାଳନା କରିଥିଲେ।
