ସାକ୍ଷୀଗୋପାଳ,୧୮ା୪(ଡି.ଏନ.ଏ.): ସତ୍ୟବାଦୀ ଅଞ୍ଚଳର ଜୀବନଧାରା ଭାବେ ପରିଚିତ ରନତ୍ଚିରା ନଦୀ ଏବେ ଅସ୍ତିତ୍ୱ ହରାଇଛି। ଉପଯୁକ୍ତ ରକ୍ଷଣାବେକ୍ଷଣ ଓ ପୁନରୁଦ୍ଧାର ଅଭାବରୁ ଏହି ନଦୀ ପୋତି ହୋଇପଡୁଛି। ଏହି ନଦୀ କୂଳରେ ବାସ କରୁଥିବା ପ୍ରାୟ ୧୦୦ଟି ଗ୍ରାମର ଲୋକେ ବର୍ଷାଋତୁରେ ଜଳ ନିଷ୍କାସନ ସମସ୍ୟା ଯୋଗୁ ହଇରାଣ ହେଉଥିବାବେଳେ ଗ୍ରୀଷ୍ମଋତୁରେ ପାଣି ବିନା ଡହଳବିକଳ ହୋଇଥାନ୍ତି। ଏବେ ଏପ୍ରିଲ ମାସ ଅଧାବେଳକୁ ଏହି ନଦୀ ଶୁଖିବାକୁ ବସିଲାଣି। ଅନେକ ସ୍ଥାନରେ ନଦୀଶଯ୍ୟା ଶୁଖିଲା ପଡ଼ିଛି। କିଛି ଖାଲୁଆ ସ୍ଥାନରେ ଅନାବନା ଦଳ ଭର୍ତ୍ତି ରହିଥିବାରୁ ପାଣି ପ୍ରଦୂଷିତ ହୋଇଛି। ଆଗକୁ ଜଳକଷ୍ଟ ଉତ୍କଟ ହେବା ନେଇ ଆଶଙ୍କା ପ୍ରକାଶ ପାଇଛି।
ରତ୍ନଚିରା ନଦୀ ପିପିଲି ହରିପୁରଠାରୁ ଭାର୍ଗବୀ ନଦୀରୁ ବାହାରି ସତ୍ୟବାଦୀ, ପୁରୀ ସଦର ଓ ବ୍ରହ୍ମଗିରି ବ୍ଲକର ତଳମୁଣ୍ଡ ଗୋବର୍ଦ୍ଧନପୁର ପର୍ଯ୍ୟନ୍ତ ଦୀର୍ଘ ୫୦ କିଲୋମିଟର ପର୍ଯ୍ୟନ୍ତ ବୋହି ଆସିଛି। ଏହାକୁ ସରକାରୀ କାଗଜପତ୍ରରେ ଖଲାସି ନାଳ ଭାବେ ଚିତ୍ରଣ କରାଯାଇଛି। ଏହି ଖଲାସି ନାଳର ଜଳ ପରିଚାଳନା ଭାର ଭୁବନେଶ୍ୱର ଡ୍ରେନେଜ ଡିଭିଜନ ହାତରେ ରହିଛି। ଦିନ ଥିଲା ଭାର୍ଗବୀ ନଦୀର ବନ୍ୟାଜଳକୁ ନିୟନ୍ତ୍ରଣ କରିବାରେ ରନତ୍ଚିରା ସହାୟକ ହେଉଥିଲା। ରନତ୍ଚିରା ନଦୀ ଖନନ ସହ ଦଳ ସଫେଇ ପାଇଁ ବାରମ୍ବାର ଦାବି ହେଉଛି। ମାତ୍ର ପ୍ରଶାସନ ଶୁଣୁନାହିଁ। ଏଥିଯୋଗୁ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଜଳକଷ୍ଟରୁ ରକ୍ଷା ପାଇଁ ତୁରନ୍ତ ନଦୀରେ ପାଣି ଛାଡ଼ିିବାକୁ ସ୍ଥାନୀୟ ଲୋକେ ଦାବି କରିଛନ୍ତି। ଏ ନେଇ ସାକ୍ଷୀଗୋପାଳ ଜଳସମ୍ପଦ ଉପଖଣ୍ଡ ସହକାରୀ ନିର୍ବାହୀ ଯନ୍ତ୍ରୀ ଇଂ. ରଘୁନାଥ ସ୍ବାଇଁ କହିଛନ୍ତି, ଉଚ୍ଚ କର୍ତ୍ତୃପକ୍ଷଙ୍କ ନିର୍ଦ୍ଦେଶ ଅନୁଯାୟୀ ପଦକ୍ଷେପ ନିଆଯିବ।
