ନୂଆଦିଲ୍ଲୀ,୮।୩: ଲାଞ୍ଚ ଗ୍ରହଣ ମାମଲାରେ ସିବିଆଇର ପୂର୍ବତନ ସ୍ବତନ୍ତ୍ର ନିର୍ଦ୍ଦେଶକ ରାକେଶ ଅସ୍ଥାନା ଏବଂ ଡିଏସ୍ପି ଦେବେନ୍ଦ୍ର କୁମାରଙ୍କୁ କେନ୍ଦ୍ରୀୟ ତଦନ୍ତକାରୀ ସଂସ୍ଥା କ୍ଲିନ୍ଚିଟ୍ ଦେଇଛି। ଶନିବାର ସିବିଆଇ ସ୍ବତନ୍ତ୍ର କୋର୍ଟ ଉକ୍ତ କ୍ଲିନ୍ଚିଟ୍କୁ ଗ୍ରହଣ କରିଥିବାରୁ ଅସ୍ଥାନାଙ୍କ ପାଇଁ ବଡ଼ ଆଶ୍ୱସ୍ତି ହୋଇଛି। ଅନ୍ୟପକ୍ଷରେ ସିବିଆଇର ଚାର୍ଜଶିଟ୍କୁ ମଧ୍ୟ ଅଦାଲତ ବିଚାରକୁ ନେଇଛନ୍ତି। ଅସ୍ଥାନା ଓ ଦେବେନ୍ଦ୍ରଙ୍କ ବିରୋଧରେ ତଦନ୍ତ ଆଗେଇବା ପାଇଁ ଯଥେଷ୍ଟ କାରଣ ନାହିଁ ବୋଲି ସ୍ବତନ୍ତ୍ର ସିବିଆଇ ବିଚାରପତି ସଞ୍ଜୀବ ଅଗ୍ରଓ୍ବାଲ ମତ ଦେଇଛନ୍ତି। ସିବିଆଇ ଡିଏସ୍ପି ଦେବେନ୍ଦ୍ରଙ୍କୁ ୨୦୧୮ରେ ଗିରଫ କରାଯାଇ ପରେ ଜାମିନରେ ଛଡ଼ାଯାଇଥିଲା। ଚାର୍ଜଶିଟ୍ରେ ଅଭିଯୁକ୍ତ ଥିବା ମଧ୍ୟସ୍ଥ ମନୋଜ ପ୍ରସାଦଙ୍କୁ କୋର୍ଟ ସମନ ଜାରି କରିଛନ୍ତି। ଏହାବ୍ୟତୀତ ପ୍ରସାଦଙ୍କ ଭାଇ ସୋମେଶ୍ୱର ଶ୍ରୀବାସ୍ତବ ଓ ଶ୍ୱଶୁର ସୁନୀଲ ମିତ୍ତଲଙ୍କୁ ମଧ୍ୟ ସମନ ଜାରି କରାଯାଇଛି। ସେମାନଙ୍କୁ ଏପ୍ରିଲ ୧୩ରେ ହାଜର ହେବା ଲାଗି କୋର୍ଟ ନିର୍ଦ୍ଦେଶ ଦେଇଛନ୍ତି। ଏହି ତଦନ୍ତରେ ଅସ୍ଥାନାଙ୍କ ବିରୋଧରେ କୌଣସି ପ୍ରମାଣ ମିଳିଲେ ସିବିଆଇ ତାଙ୍କ ବିରୋଧରେ ଚାର୍ଜଶିଟ୍ ଦାଖଲ କରିପାରିବ ବୋଲି କୋର୍ଟ କହିଛନ୍ତି।
