ନୂଆଦିଲ୍ଲୀ,୧୭।୨: କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ହର୍ଷ ବର୍ଦ୍ଧନ ସୋମବାର ଚାଇନାର ଉହାନ ସହରରୁ ପ୍ରଥମ ବ୍ୟାଚରେ ଫେରିଥିବା ଭାରତୀୟଙ୍କୁ ଭେଟିଛନ୍ତି। ଏମାନେ ସମସ୍ତେ ଇଣ୍ଡୋ-ତିବତାନ ବର୍ଡର ପୋଲିସ(ଆଇଟିବିପି)ଯବାନଙ୍କ ଦ୍ୱାରା ଚାଓ୍ବଲାରେ ନିର୍ମାଣ କରାଯାଇଥିବା ଅସ୍ଥାୟୀ କ୍ୟାମ୍ପରେ ରହିଥିଲେ। ସେଠାରେ ସେମାନଙ୍କର କରୋନା ଭାଇରସ ସମ୍ପର୍କିତ ସମସ୍ତ ସ୍ବାସ୍ଥ୍ୟ ପରୀକ୍ଷା ସରିଯିବା ପରେ ଏବେ ସେମାନେ ଘରକୁ ଫେରିଯିବାକୁ ଅନୁମତି ପାଇଛନ୍ତି। ସୂଚନାଯୋଗ୍ୟ, କରୋନା ଭାଇରସରେ ଚାଇନାର ଉହାନ ସହରରେ ସବୁଠାରୁ ଅଧିକ ଲୋକ ସଂକ୍ରମିତ ହୋଇଥିବା ଓ ସବୁଠାରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ଖବର ପାଇବା ପରେ କେନ୍ଦ୍ର ସରକାର ସେଠାରେ ଥିବା ଭାରତୀୟଙ୍କୁ ଉଦ୍ଧାର କରିବା ପାଇଁ ଏକ ସ୍ବତନ୍ତ୍ର ବିମାନ ପଠାଇଥିଲେ। ଆଉ ଏମାନଙ୍କୁ ଭାରତ ଆଣିବା ପରେ ଚାଓ୍ବଲାରେ ସ୍ବତନ୍ତ୍ର ଭାବେ ତିଆରି କରାଯାଇଥିବା ଶିବିରରେ ରଖି ସେମାନଙ୍କର ସ୍ବାସ୍ଥ୍ୟ ପରୀକ୍ଷା କରାଯାଇଥିଲା। ଏମାନଙ୍କ ମଧ୍ୟରୁ ଅଧିକାଂଶଙ୍କ ରକ୍ତ ନମୁନା ନେଗେଟିଭ ଆସିବାରୁ ଏବେ ଏହି ଭାରତୀୟଙ୍କୁ ସେମାନଙ୍କ ଘରକୁ ଯିବାକୁ ଅନୁମତି ମିଳିଛି।
