ଦୁବାଇ, ୭।୬(ପି.ଟି.)- ଚଳିତ ବର୍ଷର ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ) ଆୟୋଜନ ପାଇଁ ୟୁନାଇଟେଡ ଆରବ ଏମିରେଟ୍ସ (ୟୁଏଇ) ଆଗ୍ରହ ପ୍ରକାଶ କରିଛି। କୋଭିଡ-୧୯ ପାଇଁ ଭାରତ ଯଦି ଏହି ବ୍ୟୟବହୁଳ ଟି୨୦ ଲିଗ୍କୁ ବାହାର ପରିବେଶରେ କରାଇବାକୁ ଆଗ୍ରହ ପ୍ରକାଶ କରେ ତେବେ ଆମେ ପ୍ରସ୍ତୁତ ଅଛୁ ବୋଲି ଶନିବାର ଏମିରେଟ୍ସ କ୍ରିକେଟ ବୋର୍ଡ ପକ୍ଷରୁ ପ୍ରକାଶ କରାଯାଇଛି। ଆଇପିଏଲର ୧୩ତମ ସଂସ୍କରଣ ଗତ ମାର୍ଚ୍ଚରେ ଆରମ୍ଭ ହେବାର ଥିଲା। ମାତ୍ର ବିଶ୍ୱବ୍ୟାପୀ ସ୍ବାସ୍ଥ୍ୟ ସଙ୍କଟ ଦେଖାଦେଇଥିବାରୁ ଏହାକୁ ଅନିର୍ଦ୍ଦିଷ୍ଟକାଳ ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି। ଚଳିତ ବର୍ଷ ଅଷ୍ଟ୍ରେଲିଆରେ ହେବାକୁଥିବା ଟି୨୦ ବିଶ୍ୱକପ ଯଦି ସମ୍ଭବ ନ ହୁଏ ତେବେ ଆସନ୍ତା ଅକ୍ଟୋବରରେ ଏହାକୁ ଆୟୋଜନ ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ଯୋଜନା କରୁଥିବା ଆଲୋଚନା ହେଉଛି। ୟୁଏଇ କ୍ରିକେଟ ବୋର୍ଡ ପକ୍ଷରୁ ଆଇପିଏଲ ଆୟୋଜନ ପାଇଁ ଅଫର ଦିଆଯିବା ସମ୍ପର୍କରେ ଗଲ୍ଫ ନ୍ୟୁଜ ରିପୋର୍ଟରେ ପ୍ରକାଶ ପାଇଛି। ”ଏମିରେଟ୍ସ କ୍ରିକେଟ ବୋର୍ଡ ପୂର୍ବରୁ ୟୁଏଇରେ ସଫଳତାର ସହ ଆଇପିଏଲ ମ୍ୟାଚ ଆୟୋଜନ କରିଛି। ଏହା ବ୍ୟତୀତ ଆମେ ନିରପେକ୍ଷ ଭେନ୍ୟୁଭାବେ ଅନେକ ଦ୍ୱିପାକ୍ଷିକ ସିରିଜ ଏବଂ ବହୁ ରଷ୍ଟ୍ରୀୟ ଟୁର୍ନାମେଣ୍ଟ ମଧ୍ୟ ଆୟୋଜନ କରିଛୁ। ଆମ ଷ୍ଟେଟ୍-ଅଫ୍-ଦି-ଆର୍ଟ ଭେନ୍ୟୁ ଗୁଡ଼ିକ ସମସ୍ତ ପ୍ରକାର କ୍ରିକେଟ ଟୁର୍ନାମେଣ୍ଟ ଆୟୋଜନ ପାଇଁ ଉପଯୁକ୍ତ ବୋଲି“ ବୋଲି ଏହାର ସାଧାରଣ ସମ୍ପାଦକ ମୁବାଶଶିର ଉସମାନି ପ୍ରକାଶ କରିଛନ୍ତି। ଏମିରେଟ୍ସ କ୍ରିକେଟ ବୋର୍ଡ ଇଂଲିଶ୍ ସିଜନ ଶେଷ କରିବା ପାଇଁ ଇଂଲଣ୍ଡ ଆଣ୍ଡ ଓ୍ବେଲ୍ସ କ୍ରିକେଟ ବୋର୍ଡକୁ ମଧ୍ୟ ଅଫର ଦେଇଥିଲା ବୋଲି ଉସମାନି କହିଛନ୍ତି। ପ୍ରକାଶ ଯୋଗ୍ୟ ଯେ, ୟୁଏଇ ପୂର୍ବରୁ ଅନ୍ୟ ବୋର୍ଡ ମଧ୍ୟରେ ଶ୍ରୀଲଙ୍କା କ୍ରିକେଟ ଆଇପିଏଲ ଆୟୋଜନ ପାଇଁ ପ୍ରସ୍ତାବ ଦେଇଥିଲା। ଚଳିତ ମାସ ୧୦ ତାରିଖରେ ଭିଡିଓ କନ୍ଫରେନ୍ସ ମାଧ୍ୟମରେ ଆଇସିସି ବୋର୍ଡ ବୈଠକ ଅନୁଷ୍ଠିତ ହେବ। ଏହି ବୈଠକରେ ଚଳିତ ବର୍ଷର ଟି୨୦ ବିଶ୍ୱକପ ଭାଗ୍ୟ ନିର୍ଦ୍ଧାରିତ ହେବ। ଫଳରେ ଆଇପିଏଲ ଆୟୋଜନକୁ ନେଇ ସ୍ପଷ୍ଟ ଚିତ୍ର ମିଳିଯିବ।
