ଇଂଲଣ୍ଡ ମହିଳା କ୍ରିକେଟ୍ ଦଳର ଷ୍ଟାର୍ ଅଲ୍ରାଉଣ୍ଡର ଡାନିଏଲ୍ ଓ୍ବେଟ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ଦଳ ପକ୍ଷରୁ ଖେଳିବାକୁ ପସନ୍ଦ କରନ୍ତି ବୋଲି କହିଛନ୍ତି। ୨୯ ବର୍ଷୀୟା ଡାନିଏଲ୍ କହିଛନ୍ତି, ବାଙ୍ଗାଲୋର ଦଳରେ କ୍ରିସ୍ ଗେଲ୍, ବିରାଟ କୋହଲି, ମୋଇନ୍ ଅଲୀ ଓ ଏବି ଡି ଭିଲର୍ସଙ୍କ ପରି ବିଶ୍ୱର କିଛି ପ୍ରମୁଖ ଖେଳାଳି ରହିଛନ୍ତି। ଏହି କାରଣରୁ ଆର୍ସିବିକୁ ଚୟନ କରିବା ଅପେକ୍ଷା ତାଙ୍କ ପାଖରେ ଆଉ କିଛି ବିକଳ୍ପ ନ ଥିଲା ବୋଲି ଡାନିଏଲ୍ ନିକଟରେ ଏକ ସାକ୍ଷାତ୍କାର ଅବସରରେ ଏହା କହିଛନ୍ତି। ଏହି ସାକ୍ଷାତ୍କାରରେ ତାଙ୍କୁ ଯେତେବେଳେ ପଚାରା ଯାଇଥିଲା, ତୁମର ପସନ୍ଦର ଆଇପିଏଲ୍ ଦଳ ଯାହା ପକ୍ଷରୁ ତୁମେ ଖେଳିବାକୁ ସ୍ବପ୍ନ ରଖିଛ। ଏହାର ଉତ୍ତରରେ ଡାନିଏଲ୍ ଆର୍ସିବି ନାମ ନେଇଥିଲେ। ଏଠାରେ ଉଲ୍ଲେଖଯୋଗ୍ୟ, ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ) ପକ୍ଷରୁ ୨୦୧୯ରେ ଆୟୋଜିତ ହୋଇଥିବା ମହିଳା ଟି୨୦ ଚ୍ୟାଲେଞ୍ଜର ପ୍ରତିଯୋଗିତାରେ ଡାନିଏଲ୍ ‘ଭେଲୋସିଟି’ ଦଳ ପକ୍ଷରୁ ପ୍ରତିନିଧିତ୍ୱ କରିଥିଲେ। ଏହି ଦଳରେ ମିଥାଲି ରାଜଙ୍କ ସହ ସେ ଏକାଠି ଖେଳିଥିବାବେଳେ ପ୍ରତିଯୋଗିତାରେ ଭେଲୋସିଟି ରନର୍ସଅପ୍ ହୋଇଥିଲା। ଭେଲୋସିଟି ଖେଳିଥିବା ୨ଟି ମ୍ୟାଚ୍ରେ ଡାନିଏଲ୍ ଦଳର ଟପ୍ ସ୍କୋରର ରହିଥିଲେ। ସେହିଭଳି ଚଳିତ ବର୍ଷ ପ୍ରାରମ୍ଭରେ ଅଷ୍ଟ୍ରେଲିଆରେ ଅନୁଷ୍ଠିତ ହୋଇଥିବା ମହିଳା ଟି୨୦ ବିଶ୍ୱକପ୍ରେ ଓ୍ବେଟ୍ଟ ଇଂଲଣ୍ଡ ଦଳରେ ସ୍ଥାନ ପାଇଥିଲେ। ସର୍ବଦା ଭାରତୀୟ ଖେଳାଳିଙ୍କ ସହିତ ଯୋଗାଯୋଗରେ ଥିବାରୁ ଓ୍ବେଟ୍ଟ ଭାରତରେ ବେଶ୍ ଲୋକପ୍ରିୟ ହୋଇପାରିଛନ୍ତି।
