ଭୁବନେଶ୍ୱର,୧ା୬(ବ୍ୟୁରୋ): କରୋନା କଟକଣା କୋହଳ ହେବା ପରେ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ପକ୍ଷରୁ ବାକି ଥିବା ଉଚ୍ଛେଦ କାର୍ଯ୍ୟ ପୁଣି ଆରମ୍ଭ ହେବାକୁ ଯାଉଛି। ସୋମବାରଠାରୁ ଭୁବନେଶ୍ୱର ମହାନଗର ନିଗମ (ବିଏମ୍ସି) ଓ ବିଡିଏର ମିଳିତ ଉଚ୍ଛେଦକାରୀ ଦଳ ଚନ୍ଦ୍ରଶେଖରପୁରସ୍ଥିତ ନୀଳମାଧବ ବସ୍ତିର ବ୍ଲକ୍-ସିକୁ ଭାଙ୍ଗିବ ବୋଲି ସୂଚନା ମିଳିଛି। ସମ୍ପୃକ୍ତ ବସ୍ତିରେ ବିଡିଏ ଦ୍ୱାରା ରାଜୀବ ଆବାସ ଯୋଜନା (ଆରଏଓ୍ବାଇ)ରେ ଗୃହ ନିର୍ମାଣ କାର୍ଯ୍ୟ କରାଯିବା ସକାଶେ ଏହି ଉଚ୍ଛେଦ କରାଯାଉଛି। ବ୍ଲକ୍-ସିରେ ରହୁଥିବା ଶହେରୁ ଊର୍ଦ୍ଧ୍ୱ ପରିବାର ଉକ୍ତ ବସ୍ତିର ବ୍ଲକ୍-ବିକୁ ସ୍ଥାନାନ୍ତରିତ ହେବାକୁ ବିଡିଏ ପକ୍ଷରୁ ନିର୍ଦ୍ଦେଶ ଦିଆଯାଇଛି। ପୂର୍ବରୁ ବ୍ଲକ୍-ଏରେ ରହୁଥିବା ୨ଶହରୁ ଊର୍ଦ୍ଧ୍ୱ ଘରକୁ ଭଙ୍ଗାଯିବା ସହ ଏଠାରେ ରହୁଥିବା ପରିବାରଙ୍କୁ ଏକ ଟ୍ରାଞ୍ଜିଟ୍ ହାଉସ୍କୁ ସ୍ଥାନାନ୍ତରିତ କରାଯାଇଥିଲା। ଆରଏଓ୍ବାଇ ଘର ନିର୍ମାଣ ସରିଲେ ସମସ୍ତ ବସ୍ତିବାସିନ୍ଦାଙ୍କୁ ବଣ୍ଟନ କରାଯିବ ବୋଲି ଉଚ୍ଛେଦକାରୀ ଦଳ ପକ୍ଷରୁ ସୂଚନା ମିଳିଛି।
