ତେଲକୋଇ, ୨୭।୧୦(ଡି.ଏନ.ଏ.): କେନ୍ଦୁଝର ଜିଲା ତେଲକୋଇ ବ୍ଲକ ଅଧୀନରେ ଥିବା ସିରିଗିଡା ଆଞ୍ଚଳିକ ବିଜ୍ଞାନ ମହାବିଦ୍ୟାଳୟର ଅଧ୍ୟାପକ ଓ କର୍ମଚାରୀମାନେ ଗତ ଜୁଲାଇ ମାସରୁ ଦରମା ପାଇନାହାନ୍ତି । ସେହିପରି ଇପିଏଫ୍ ପାଇଁ ୧୫ପ୍ରତିଶତ ଅଂଶ ଧନ ଦିଆ ନ ଯିବାକୁ ନେଇ ବିବାଦ ସୃଷ୍ଟି ହୋଇଛି । ଏହାକୁ ସମୂହ କର୍ମଚାରୀ ଉଚ୍ଚ ଶିକ୍ଷା ବିଭାଗ ଡାଇରେକ୍ଟର(ଭୁବନେଶ୍ୱର)ସମେତ କମିଶନର କମ୍ ସେକ୍ରେଟାରୀ ସ୍କୁଲ ଏବଂ ମାସ ଏଜୁକେଶନ ଏବଂ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ, ଶିକ୍ଷା ମନ୍ତ୍ରୀ ଏବଂ ଦକ୍ଷତା ବିକାଶ ମନ୍ତ୍ରୀଙ୍କୁ ଜଣାଇଛନ୍ତି ।
ଅଭିଯୋଗ ଅନୁଯାୟୀ, ଗତ ଜୁଲାଇ ମାସରୁ ସଂପୃକ୍ତ କର୍ମଚାରୀମାନେ ଦରମା ପାଇନାହାନ୍ତି । କର୍ମଚାରୀଙ୍କ ୧୫ପ୍ରତିଶତ ଇପିଏଫ୍ ଟଙ୍କା ଅଧ୍ୟକ୍ଷଙ୍କ ଆକାଉଣ୍ଟକୁ ଆସିଥିଲେ ହେଁ ପ୍ରଦାନ କରାଯାଇନାହିଁ । ସେହିପରି କଲେଜର କର୍ମଚାରୀଙ୍କ ଦରମା ଆକ୍ରୋଶମୂଳକ ଭାବେ ନଭେମ୍ବର ୨୦୧୭ରୁ ଦିଆଯାଉନାହିଁ । ଯେଉଁମାନେ ଏଥିପାଇଁ ମୁହଁ ଖୋଲୁଛନ୍ତି ସେମାନଙ୍କୁ ନିର୍ଯାତନା ଦିଆଯାଉଥିବା ଅଭିଯୋଗ ହୋଇଛି । ସେହିପରି ଇପିଏଫ୍ ପାଇଁ ସରକାର ଚିଠି ନଂ-୩୩୦୬୪ ତା ୨୨ା୧୧ା୧୦୧୬ରେ ସମ୍ମତି ପ୍ରଦାନ କରିଛନ୍ତି। ଏଥିପାଇଁ କଲେଜର ସମସ୍ତ ଅଧ୍ୟାପକ ଓ କର୍ମଚାରୀ ତାଙ୍କ ଦରମା ଓ ଇପିଏଫ୍ ୧୫ ପ୍ରତିଶତ ତୁରନ୍ତ ପାଇବାକୁ ଦାବି କରିଛନ୍ତି ।
ଏ ସମ୍ପର୍କରେ ବିଜ୍ଞାନ ମହାବିଦ୍ୟାଳୟର ଅଧ୍ୟକ୍ଷ ଗିରିଜା ଶଙ୍କର ମହାପାତ୍ରଙ୍କୁ ପଚାରିବାରୁ ଇପିଏଫ୍ ଟଙ୍କା ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ ଆକାଉଣ୍ଟରେ ଅଛି । ଦରମା ପ୍ରଦାନରେ ସାମାନ୍ୟ ଅସୁବିଧା ହୋଇଛି । କେବଳ ସେପ୍ଟେମ୍ବର ଓ ଅକ୍ଟୋବର ମାସର ଦରମା ବକେୟା ରହିଛି ବୋଲି ସେ ସ୍ବୀକାର କରିଛନ୍ତି ।
