ଆଠମଲ୍ଲିକ,୧୫ା୮(ଡି.ଏନ.ଏ.) ମହାନଦୀ ଉପରମୁଣ୍ଡରେ ପ୍ରବଳ ବର୍ଷା ଯୋଗୁ ଅନୁଗୋଳ ଜିଲାର ଆଠମଲ୍ଲିକ ସହର ସମେତ ବ୍ଲକରେ ବୁଧବାର ବନ୍ୟା ଜଳ ପ୍ରବେଶ କରିଛି। ଏଥିଯୋଗୁ ଶହ ଶହ ହେକ୍ଟର ଚାଷ ଜମି ଜଳମଗ୍ନ ହୋଇଥିବା ବେଳେ ତିନୋଟି ପଞ୍ଚାୟତ ଓ ଗୋଟିଏ ଗାଁ ବାହ୍ୟଜଗତରୁ ବିଚ୍ଛିନ୍ନ ହୋଇଯାଇଛି। ବୁଧବାର ଆଠମଲ୍ଲିକ ବିଧାୟକ ରମେଶ ଚନ୍ଦ୍ର ସାଏ ଓ ଉପଜିଲାପାଳ ଡ. ରଜନୀକାନ୍ତ ବିଶ୍ୱାଳ ବନ୍ୟାଞ୍ଚଳ ପରିଦର୍ଶନ କରିଛନ୍ତି।
ଆଠମଲ୍ଲିକ ଏନଏସି ସମେତ ବ୍ଲକର କିଆକଟା, ବାସୁଦେବପୁର, ଲୁଣହାଣ୍ଡି, କନ୍ଧପଡା, କମ୍ପଲା, କୁଦଗାଁ, ପୁରୁଣାମାଣତ୍ରୀ, ନଅଗାଁ, ଅଏଡା, ଜାମୁଡୋଲି, ଲୁହାସିଙ୍ଗା ଆଦି ପଞ୍ଚାୟତର ୪୦୦ ହେକ୍ଟରରୁ ଊର୍ଦ୍ଧ୍ୱ ଚାଷ ଜମି ଜଳମଗ୍ନ ହୋଇଛି। ଏହାଛଡା ଆଠମଲ୍ଲିକ ବିନିକେୟୀ ରାସ୍ତାର କଣ୍ଟିଆଣି ଓ ଚଣାଗଡି ନାଳ ପୋଲ ଉପରେ ବନ୍ୟାଜଳ ପ୍ରବାହିତ ହେବା ଫଳରେ ଲୁହାସିଙ୍ଗା, ଜାମୁଡୋଲି ପଞ୍ଚାୟତ ବାହ୍ୟ ଜଗତରୁ ବିଚ୍ଛିନ୍ନ ହୋଇଛି। ଅଏଡା ପଞ୍ଚାୟତର ଓଳଥ ଗ୍ରାମ, କୁଦଗାଁ ପଞ୍ଚାୟତର କୁଦଗାଁ ବିଛିନ୍ନ ହୋଇଛି। ଆଠମଲ୍ଲିକ-ମାଧପୁର ରାସ୍ତାରେ ଥିବା ପ୍ରଶିଦ୍ଧ ଶୈବପୀଠ ତଥା ପର୍ଯ୍ୟଟନସ୍ଥଳୀ ଦେଉଳଝରୀ ମନ୍ଦିର ପରିସରରେ ବନ୍ୟାଜଳ ପ୍ରବେଶ କରିଥିବା ଜଣାପଡିଛି। କୁଦଗାଁ ଗ୍ରାମବାସୀ ଜଳବନ୍ଦୀ ଥିବାରୁ ୪୦୦ ଲୋକଙ୍କ ପାଇଁ ଚୁଡା, ଗୁଡ, ବିସ୍କୁଟ, ପିଇବା ପାଣି ବ୍ୟବସ୍ଥା କରାଯାଇଛି। ସେହିଭଳି ଚଣାଗଡି ନାଳ ଓ ଓଳଥରେ ବେସରକାରୀ ଡଙ୍ଗା, ଅଗ୍ନିଶମ ବିଭାଗ ଯନ୍ତ୍ର ଚାଳିତ ବୋଟ୍ର ବ୍ୟବସ୍ଥା କରାଯାଇଛି। ବିଧାୟକ ସାଏ ହେଲେଇ, କୁଦଗାଁର ବନ୍ୟା ପରିସ୍ଥିତି ଅନୁଧ୍ୟାନ କରିଛନ୍ତି।
