କମିଶନରେଟ ପୋଲିସ ଇଲାକାରେ ରହିଛି ରାଜଧାନୀ ଭୁବନେଶ୍ୱର। ଏଠି ସୁରକ୍ଷା ଅପହଞ୍ଚ, ଅପରାଧୀଙ୍କୁ ଛାଡ଼ି ପୋଲିସ ହେଲ୍ମେଟ୍ରେ ବ୍ୟସ୍ତ। ଉନ୍ନତ ଟେକ୍ନୋଲୋଜି, ଦକ୍ଷ ଅଧିକାରୀ ରହିଥିବା ସତ୍ତ୍ୱେ ସହରରେ ବଢ଼ି ଚାଲିଛି ହତ୍ୟା, ଲୁଟ୍ ପରି ଅପରାଧ। ବିଶେଷକରି ଲୁଟେରା ଗ୍ୟାଙ୍ଗ୍ ସକ୍ରିୟ ହୋଇଉଠିଥିବାବେଳେ ପ୍ରତିଦିନ ପ୍ରତି ଥାନାଞ୍ଚଳରେ ଘଟୁଛି ଲୁଟ୍, ଚୋରି, ଡକାୟତି ଆଦି ଘଟଣା। ରାଜରାସ୍ତାଠାରୁ ଆରମ୍ଭ କରି କଲୋନୀ ଓ ଘରେ ଘଶି ଆତଙ୍କ ଖେଳାଉଛନ୍ତି ଲୁଟେରା। ପରିସ୍ଥିତି ଏପରି ହୋଇଛି ସତେଯେମିତି ଭୁବନେଶ୍ୱର ପାଲଟି ଯାଇଛି ଆତଙ୍କର ସହର। ମଙ୍ଗଳବାର ୨୧ ଘଣ୍ଟା ମଧ୍ୟରେ ୪ଟି ବଡ଼ ବଡ଼ ଲୁଟ୍ ଓ ଡକାୟତି ସହ ଏକାଧିକ ଛୋଟ ଘଟଣା ଘଟିବା ପରେ ସହରବାସୀ ଆତଙ୍କିତ ଅବସ୍ଥାରେ ରହିଛନ୍ତି। ଉତ୍ତ୍ୟକ୍ତ ଲୋକେ ସୁରକ୍ଷା ପାଇଁ ରାସ୍ତାକୁ ଓହ୍ଲାଇଛନ୍ତି। ବୁଧବାର ରସୁଲଗଡ଼ ଛକରେ ଧାରଣା, ପୋଡ଼ାଜଳା ଓ ପୋଲିସ ବିରୋଧରେ ନାରାବାଜି ସହରର ଆଇନଶୃଙ୍ଖଳାକୁ ପଦାକୁ ପକାଇ ଦେଇଥିବାବେଳେ ଏହି ବାଟଦେଇ ଯାଉଥିବା ରାଜ୍ୟ ତଥା ରାଜ୍ୟ ବାହାରର ଲୋକେ ଏଣିକି ସତର୍କ ରହିବେ ବୋଲି କହୁଥିବା ଦେଖିବାକୁ ମିଳିଥିଲା।
