ଅମରାବତୀ,୨୭ା୩ (ପି.ଟି.): ତେଲଙ୍ଗାନା ରାଜଧାନୀ ହାଇଦ୍ରାବାଦରୁ ଫେରିଥିବା ୧୦୦୦ରୁ ଊର୍ଦ୍ଧ୍ୱ ଲୋକ ବୁଧବାର ଅପରାହ୍ନରୁ ଗରିକାପାଡୁ ଚେକ୍ପୋଷ୍ଟରେ ଅଟକି ରହିଛନ୍ତି। କରୋନା ସଂକ୍ରମଣ ଭୟରେ ଆନ୍ତଃରାଜ୍ୟ ସୀମାରେ ମୁତୟନ ଥିବା ପୋଲିସ ସେମାନଙ୍କୁ ଆନ୍ଧ୍ରପ୍ରଦେଶ ଭିତରେ ପୂରାଇ ଦେଉନି। ଲକ୍ଡାଉନ୍ ଯୋଗୁ ରାଜ୍ୟ ସୀମାକୁ ସିଲ୍ କରିଦିଆଯାଇଥିବାରୁ କୌଣସି ଗାଡ଼ି କିମ୍ବା ବ୍ୟକ୍ତିଙ୍କୁ ଛଡ଼ାଯିବ ନାହିଁ ବୋଲି ସ୍ଥାନୀୟ ଡିଏସ୍ପି ରମଣ ମୂର୍ତ୍ତି କହିଛନ୍ତି। ଅଟକି ରହିଥିବା ଯାତ୍ରୀଙ୍କ ପାଖରେ ପାଣି କି ଖାଦ୍ୟ ନ ଥିବାରୁ ସେମାନେ ନାହିଁ ନଥିବା ସମସ୍ୟାର ସମ୍ମୁଖୀନ ହୋଇଛନ୍ତି। ସେମାନଙ୍କ ମଧ୍ୟରେ ଅଧିକାଂଶ ଛାତ୍ରୀଛାତ୍ର ଅଛନ୍ତି। ଲକ୍ଡାଉନ ଯୋଗୁ ତେଲଙ୍ଗାନା ସରକାର ସେମାନଙ୍କୁ ହଷ୍ଟେଲ ଖାଲି କରି ଚାଲିଯିବାକୁ କହିଥିଲେ।
