କୋକସରା,୧୪।୧୨(ଡି.ଏନ୍.ଏ.): କଳାହାଣ୍ଡି-ନବରଙ୍ଗପୁର ସୀମାନ୍ତ ଆମପାଣି ଘାଟି ତଳୁ ଦୁର୍ଘଟଣାଗ୍ରସ୍ତ ଏକ ମକା ବୋଝେଇ ଟ୍ରକ୍କୁ ଶନିବାର ଠାବ କରାଯାଇ ଉଦ୍ଧାର କାର୍ଯ୍ୟ ଜାରି ରହିଛି। ଗତ ୫ ତାରିଖ ରାତିରେ ଟ୍ରକ୍ଟି ଉମରକୋଟରୁ କଟକ ଯାଉଥିବା ବେଳେ ଘାଟିର ଏକ ବୁଲାଣିରେ ଭାରସାମ୍ୟ ହରାଇ ତଳକୁ ଖସି ପଡିଥିଲା। ଏଥିରେ ଡ୍ରାଇଭରଙ୍କ ମୃତ୍ୟୁ ଘଟିଥିବା ଖବର ପାଇ ସକାଳୁ ଅମାପାଣି ପୋଲିସ ତାଙ୍କ ମୃତଦେହ ଉଦ୍ଧାର ଲାଗି ଉଦ୍ୟମ ଜାରି ରଖିଛି। ମୃତକ ଡ୍ରାଇଭର ବୌଦ୍ଧ ହରଭଙ୍ଗାର ହେମନ୍ତ ଭୋକ୍ତା ବୋଲି ଜଣାପଡ଼ିଛି। ଡ୍ରାଇଭରଙ୍କ ସହ ହେଲପେର ମଧ୍ୟ ଟ୍ରକ୍ ତଳେ ଚାପି ହୋଇଯାଇଥିବା ଅନୁମାନ କରାଯାଇଛି। ତେବେ ଉଦ୍ଧାର କାର୍ଯ୍ୟ ସରିବା ପରେ ଟ୍ରକ୍ ଭିତରେ କେତେ ଜଣ ଥିଲେ ତାହା ଜଣାପଡ଼ିବ ବୋଲି ପୋଲିସ କହିଛି। ଟ୍ରକ ରାତିରେ ଘାଟି ତଳେ ଖସିଥିବାରୁ କେହି ଟେର ପାଇ ନ ଥିବା ସୂଚନା ମିଳିଛି।
